Azərbaycan avrokuboklarda ən arzuolunmaz rəqiblərdən biri olan Moldova ilə yenidən üz-üzə gələcək. Sportnet.az-ın məlumatına görə, bu, Avropa Liqasında "Kəpəz"lə "Daçiya"nın qarşıdurması olacaq.
Kişinyovu təmsil edən "Daçiya" artıq 2-ci dəfədir Azərbaycan klubuna rəqib olub. Bu, ilk dəfə 9 il öncə artıq tarixin yaddaşına köçən İntertoto kubokunda "Bakı" ilə sınaqla həyata keçib. Onda hər 2 oyun 1:1 hesabı ilə nəticələnib və cütün taleyi Kişinyovdakı cavab matçında penaltilərlə rəqibin xeyrinə həll olunub.
Azərbaycan Moldova klubları ilə ilk 5 duelin hamısından məğlub ayrılmışdı. Bu uğursuzluğu 2 dəfə "Xəzər Lənkəran", hərəyə 1 dəfə "Bakı", "Qarabağ" və "MKT-Araz" yaşayıb. Lənkəran klubu avrokuboklarda debütünü məhz moldovalılara qarşı edərək, "Nistru"ya hər 2 oyunda uduzub. İlk 10 matçda yalnız "MKT-Araz" 1 dəfə qələbə qazansa da, bu, cütün qalibi olmağa yetməyib.
Yalnız son dueldə "İnter" "Moldova kabusu"nu aradan qaldıra bilib. Özü də "bankirlər" "Tiraspol"a hər 2 oyunda qalib gəlməyi bacarıb.
Xatırladaq ki, "Kəpəz"in baş məşqçisi Şahin Diyev futbolçu karyerası ərzində Moldovada legioner həyatı yaşayıb. Bu, elə Kişinyovda - SSRİ çempionatda "Nistru"da olub.
Azərbaycan və Moldova klublarının avrokuboklarda görüşləri
UEFA kuboku, 2005/06 mövsümü
"Nistru" - "Xəzər Lənkəran" - 3:1
"Xəzər Lənkəran" - "Nistru" - 1:2
UEFA kuboku, 2006/07 mövsümü
"Zimbru" - "Qarabağ" - 1:1
"Qarabağ" - "Zimbru" - 1:2 (əsas vaxt - 1:1)
İntertoto kuboku, 2006/07 mövsümü
"MKT-Araz" - "Tiraspol" - 1:0
"Tiraspol" - "MKT-Araz" - 2:0
İntertoto kuboku, 2007/08 mövsümü
"Bakı" - "Daçiya" - 1:1
"Daçiya" - "Bakı" - 1:1 (oyunsonrası penaltilər - 3:1)
Avropa Liqası, 2010/11 mövsümü
"Olimpiya" - "Xəzər Lənkəran" - 0:0
"Xəzər Lənkəran" - "Olimpiya" - 1:1
Avropa Liqası, 2014/15 mövsümü
"Tiraspol" - "İnter" - 3:4
"İnter" - "Tiraspol" - 3:1
