"Neftçi"nin Müşahidə Şurasının üzvü Səməd Qurbanov Avropa Liqasının II təsnifat mərhələsində Makedoniyanın "Şkendiya" klubu ilə cavab oyunu öncəsi Sportnet.az-ın Skopyeyə ezam olunmuş əməkdaşının suallarını cavablandırıb.
- "Neftçi"nin evdə qolsuz bərabərliklə nəticələnən ev matçında yaxşı oynamadığını nəzərə alsaq, səfərə hansı əhval-ruhiyyədə yollanırsınız? Bədbinlik varmı?
- Makedoniyaya yaxşı təəssüratla gedirik. Komandamız səfər matçında yaxşı oyun göstərməli, qələbə qazanmalıdır. Futbolçular da buna köklənib. Oyun saatını səbirsizliklə gözləyirlər. İstəyirlər, tez oyun olsun, tez də nəticə qazansınlar. Biz ancaq qələbə qazanmağa gedirik. Mərhələ keçməliyik, başqa əlacımız yoxdur.
- Komandanın ilk matçda oyunu sizi nə dərəcədə razı saldı?
- Sizə deyim ki, razı salmadı. Ancaq futbolçularda potensial var. Gündən-günə artırmalıdırlar. Təklikdə hamısı güclü futbolçulardır. Ancaq kollketiv oyun yoxdur. Yəqin ki, 1-2 oyundan sonra qaydasına düşür. Komandamız yeni futbolçular, yeni legionerlər var. İnanıram ki, yaxın zamanda kollektiv oyun da olacaq.
- Sizcə, heyət komplektləşib?
- Daha bir hücumçunun gəlişi nəzərdə tutulmuşdu. Bu da həll olundu. Mərhələ də olmasa, çempionatımız var. Gələn il özümüzü doğrultmalıyıq. "Neftçi"nin 80 illiyi gəlir.
- "Neftçi" avrokuboklarda vidalaşsa, baş məşqçi Vəli Qasımovun taleyi necə olacaq?
- Biz Vəli Qasımovu bu oyunlar üçün təyin etməmişik. İstənilən halda, vəzifəsində qalmalıdır, işinə davam etməlidir. Ancaq da özünü göstərməlidir. Hər halda, bu, "Neftçi"dir, elə-belə klub deyil. Vəli Qasmov canını qoymalıdır. O da bunun üçün gecə-gündüz çalışır.
- Vəli Qasımov baş məşqçi kimi özünü yaxşı göstərdi, yoxsa idman direktoru kimi? Onu nəzərə alsaq ki, klubda idman direktoru hələ də təyin olunmayıb...
- Bir az çətin sualdır. Vəliyə uğurlar arzulayıram. İndi ələ vəziyyətdir ki, Vəli Qasımovu baltalamaq, əleyhinə bir şey demək düzgün olmaz. Onu bu vəzifəyə təyin eytmişiksə, dəstəkləməliyik, ona inanmalıyıq.
- "Neftçi"də idman direktoruna ehtiyac varmı? Bəlkə heç olmayacaq?
- Bir dəfə klubda xaricdən idman direktoru əlmişdi. Səhv eləmirəmsə, ispan idi. Mənə elə gəlir ki, idman direktoru sırf uşaqlarla məşğul olmalıdır. Onun əsas komandaya heç bir aidiyyatı olmamalı, sırf uşaq futbolu ilə məşğul olmalıdır. Aşağı yaş qruplarından ibarət komandalara cavabdeh olmalıdır. Vəli da əsas komandaya cavadehdir. İspanın işi burada alınmadı.
