Azərbaycanın 21 yaşadək futbolçulardan ibarət yığma komandasının (U-21) Avropa çempionatının seçmə mərhələsində yer aldığı 7-ci qrupda növbəti oyun keçirilib. Sportnet.az-ın məlumatına görə, Finlandiya evdə Avstriyaya 0:1 hesabı ilə uduzub. Qonaqlara qələbəni 90+1-ci dəqiqədə yarımmüdafiəçisi Nikoa Dovedan vurduğu qolla qazandırıb.
Avstriyalılar bu qələbə sayəsində 2-ci pillədə yerini möhkəmlədib. 7 oyundan sonra hesabında 18 xal olan bu ölkənin U-21 yığması almaniyalı həmyaşıdlarından 3 xal geri qalır. Finlandiya isə 7 oyundan 12 xalla 3-cü pillədədir və ən yaxın izləyicisi olan Azərbaycandan 5 xal öndədir. Avstriya rəqibini məğlub etməklə Yaşar Vahabzadənin komandasının 3-cü pilləyə yüksəlmək şansını saxlayıb. Düzdür, Finlandiyanın bizdən 1 oyun çox keçirdiyini də nəzərə almaq lazımdır.
Xatırladaq ki, U-21 yığmamız növbəti qrup oyununu sentaybrın 6-da evdə autsayder Farer adaları ilə keçirəcək. Finlandiya isə həmin gün Almaniyanı qonaq edəcək.
