Portuqaliya futzal yığmasının kapitanı Rikardinyo Kolumbiyada keçirilən dünya çempionatında bombardirlər siyahısına başçılıq edir. Sportnet.az-ın məlumatına görə, Azərbaycan yığması ilə 1/4 final matçında (3:2) qələbə topunun müəlllifi olan təcrübəli oyunçu 12 qolla birinci pillədə qərarlaşıb.
Həmin oyunda fərqlənən millimizin braziliyalı hücumçusu Tyaqu Bolinya isə 5 oyuna vurduğu 7 qolla 3-cü pillədə qərarlaşıb. Ancaq yığmamız çıxışını başa vurduğundan, o, qol sayını artıra bilməyəcək. Tyaqunun hesabında 2 məhsuldar ötürmə də var. Vurduğu 10 qolla Rikardinyonun ən yaxın izləyicisi olan Falkaonun şərəfini qoruduğu Braziliya yığması da çıxışını başa vurduğundan, portuqaliyalı futbolçunun bombardir olma şansı çox böyükdür.
Portuqaliya ilə qarşılaşmanı cəza səbəbindən buraxmalı olan yığmamızın qapıçısı Rövşən Hüseynli 4 oyunda etdiyi seyvlərin sayına (64) görə hələ də birincidir. O, yalnız ümumi göstəricidə argentinalı həmkarı Nikolas Sarmientudan geri qalır.
Qeyd edək ki, millimiz debüt etdiyi dünya çempionatının final mərhələsində arzuolunmaz rəqib tərəfindən mübarizədən kənarlaşdırılıb. Azərbaycan yığması indiyədək heç vaxt, o cümlədən, Avropa çempionatının final mərhələlərində Portuqaliya yığmasına qalib gələ bilməyib.
