Azərbaycan milli komandasının futbolçusu Ağabala Ramazanov Bakı "İnter"indən ayrılmaq istəyir. Bu barədə Sportnet.az-a paytaxt klubunun baş məşqçisi Zaur Svanadze məlumat verib.
Gürcüstanlı mütəxəssisin sözlərinə görə, Ramazanov komandadan getmək istəyilə ona müraciət edib. Svanadze bildirib ki, 23 yaşlı yarımmüdafiəçinin hansı kluba keçmək niyyətində olduğundan xəbərsizdir. Baş məşqçi heyətdən heç kimi göndərmək niyyətində olmadığını açıqlayıb: "Ağabaladan başqa heç bir futbolçu, o cümlədən, Ruslan Abışov mənə getmək istəyində olduğunu deməyib. Özüm də heç kimi getməsinin tərəfdarı deyiləm. Bu gün klubun yeni rəhbərliyi ilə görüşümüz olacaq. Həmin görüşdə bütün məsələlərə aydınlıq gələcək".
Qeyd edək ki, "İnter"in yeni prezidenti Azər Əliyevdir. Ağabala Ramazanovun "Neftçi"yə keçəcəyi gözlənilir.
