Çempionlar Liqasında İspaniyanın "Barselona" və Fransanın PSJ klubları arasında keçirilmiş 1/8 final mərhələsinin cavab görüşü zamanı Kataloniya paytaxtında seysmik aktivlik qeydə alınıb.
Sportnet.az-ın "Marca"ya istinadən məlumatına görə, "Nou Kamp" stadionu yaxınlığındakı Jaume Almera adına Geologiya İnstitutunda seysmoqraflar yer səthinin silkələndiyini bildiriblər. "Barsa"nın 6-cı qolundan sonra Rixter şkalası üzrə 1 maqnitudalı zəlzələ baş verib. Adi həyatda insanlar belə zəlzələni nadir hallarda hiss edirlər. Lakin bu, seysmoqraflar tərəfindən daim qeydə alınır.
Xatırladaq ki, "Barselona" ilk görüşdə 0:4 hesabı ilə uduzduğu PSJ-ni cavab qarşılaşmasında 6:1 hesabı ilə yenərək mərhələ adlayıb. Sonuncu qolu kataloniyalıların futbolçusu Serxi Roberto 90+5-ci dəqiqədə vurublar.
