"Bakılı" klubunun prezidenti Misir Əbilov oyun zamanı futbolçusunu təhqir edib. Sportnet.az-ın məlumatına görə, xoşagəlməz olay Azərbaycan I Divizionunda XIX turun "Şəmkir"lə ev oyununda baş verib.
İkinci hissədə komandasının hücumu zamanı Elvin Hacızadənin cinah asmasını "Şəmkir"in qapıçısı dəf edib. Hacızadənin düzgün ötürmə verə bilməməsinə əsəbiləşən Əbilov ona "Səy oğlu səy" söyüşünü ünvanlayıb. 23 yaşlı yarımmüdafiəçi buna heç bir reaksiya verməyib. Klub prezidentinin sözləri oyunu lentə alan PFL-in görüntülərində 3:15-ci dəqiqədə də əksini tapıb. Həmin görüntülərdə Əbilovun senzuradankənar ifadələri də eşidilir.
Qeyd edək ki, görüş "Bakılı"nın 0:3 hesablı məğlubiyyəti ilə yekunlaşıb. Misir Əbilov əvvəllər də oyun zamanı futbolçular və hakimlərin ünvanına təhqiramiz ifadələrə yol verib.
