İtaliyanın "Milan” komandasının sabiq futbolçusu və baş məşqçisi Filippo İndzagiyə Albaniya millisinə rəhbərlik etmək təklif olunub.
Sportnet.az-ın "Sky Sport Italia” nəşrinə istinadən verdiyi məlumata görə, 44 yaşlı mütəxəssislə Albaniya Futbol Federasiyasının rəsmiləri təmasa keçib.
Ötən həftə Albaniya yığmasının hazırkı baş məşqçisi Canni De Byazi oktyabrda 2011-ci ildən etibarən tutduğu postdan gedəcəyini açıqlayıb. Yığma onun rəhbərliyi altında 2016-cı il Avropa çempionatının final mərhələsinə vəsiqə qazanıb və qrupu 3-cü pillədə başa vurub.
Heyətində "Qarabağ”ın müdafiəçisi Ansi Aqollinin də yer aldığı Albaniya millisi 2018-ci il dünya çempionatının seçmə qrup mərhələsində 9 xalla 3-cü pillədə qərarlaşıb və liderliyi bölüşən İspaniya ilə İtaliya kollektivlərindən 7 xal geri qalır.
Qeyd edək ki, 2014/2015 mövsümündə "Milan”ın sükanı arxasında olan Filippo İndzagi 2016-cı ildən "Venesiya”nın baş məşqçisidir. Onun rəhbərlik etdiyi kollektiv yeni mövsümdən İtaliyanın B seriyasında çıxış edəcək.
