"Özümü yaxşı tərəfdən göstərmək və baş məşqçinin xoşuna gəlmək istəyirdim. İlk oyun idi və ümid edirəm ki, bu cür də davam edəcək. Bu cür əhval-ruhiyyəni çempionatda da davam etdirməliyik”. Bunu Sportnet.az-a "Səbail” ilə yoxlama matçında dubl edən (2:2) "Sumqayıt” klubunun yeni futbolçusu Ramil Həsənov deyib.
Müqavilə ilə "Qəbələ”yə məxsus olan və 1 illik icarə əsasında "Sumqayıt”da çıxış edəcək 21 yaşlı hücumçu bu keçidi özünün istədiyini söyləyib. O, oyun praktikası qazanmaq üçün komandasını dəyişməyi məqsədəuyğun saydığını bildirib: "Gənc oyunçu üçün "Qəbələ”də möhkəmlənmək çətindir. Orada daha çox legionerlərə üstünlük verilir. Mənə isə təcrübə qazanmaq üçün oynamaq lazımdır. Bu baxımdan "Sumqayıt”da imkanım çox olacaq. Bu keçidi özüm istədim. Mənim oynamağım klubum üçün də yaxşıdır. Bəli, yay fasiləsində bir çox legioner "Qəbələ”dən ayrılıb. Lakin onların yerinə yeniləri olacaq”.
Qeyd edək ki, Ramil Həsənov Ukraynada doğulub. Lakin o, bu ilin yanvarında Türkiyənin Antalya şəhərində təlim-məşq toplanışı keçən 21 yaşadək futbolçulardan ibarət Azərbaycan yığmasının heyətində yer alıb və Sudanla yoxlama matçında yeganə qolun müəllifi olub (1:4).
