İtaliya "İnter"i "Fiorentina"dan futbolçu Matias Vesinonu transfer edib.
Sportnet.az-ın "neradzurri"nin rəsmi saytına istinadən məlumatına görə, uruqvaylı yarımmüdafiəçi ilə 2021-ci ilədək müqavilə bağlanılıb. Onun özünə ildə 3 milyon avro, keçmiş klubuna isə 24 milyon avro ödəniləcək. 25 yaşlı oyunçu ötən mövsüm "bənövşəyilər"in heyətində 31 matçda 3 qol və 4 məhsuldar ötürmə müəllifi olub.
Ötən mövsüm Avropa Liqasının qrup mərhələsində Vesino "Fiorentina"nın heyətində "Qarabağ"a qarşı çıxış edib. İtaliyadakı görüşdə (5:1) 46-cı dəqiqədən sonra oyunda olan Vesino Bakıdakı matçda tam oynayıb və hətta 60-cı dəqiqədə ilk qolu vuraraq, komandasının 2:1 hesablı qələbəsində pay sahibi olub.
Qeyd edək ki, Matias Vesino əvvəllər Uruqvayın "Sentral Espanyol, "Nasyonal" klublarında, eləcə də icarə əsasında "Kalyari" və "Empoli"də forma geyinib.
