Gürcüstanda təlim-məşq toplanışında olan "Qəbələ”nin əvəzedici komandası ikinci yoxlama oyununu keçirib.
Sportnet.az-ın məlumatına görə, "qırmızı-qaralar” "Saburtalo” klubunun əvəzedici komandası ilə görüşüb. Gürcüstan təmsilçisi bu oyunda əsas və U-19 komandalarının üzvlərinin də yer aldığı qarışıq heyətdən istifadə edib. Görüş Elmar Baxşıyevin yetirmələrinin 3:1 hesablı qələbəsi ilə başa çatıb. Gərgin mübarizə şəraitində keçən görüşün ilk yarısında hesabı Ülvi İsgəndərov açıb. Matçın ikinci hissəsində isə Ravil Yusifli dubl müəllifi olub.
Qeyd edək ki, "Qəbələ"nin əvəzedici komandası avqustun 2-də Gürcüstandakı ilk yoxlama oyununda Tiflis "Dinamo”sunun əvəzediciləri ilə qolsuz heç-heçə edib.
