"Qarabağ" komandası futbol üzrə Çempionlar Liqasının qrup mərhələsində debüt edib. Sportnet.az-ın məlumatına görə, C qrupunda yer alan Azərbaycan təmsilçisi ilk turda İngiltərənin paytaxtı Londonda "Çelsi"nin qonağı olub.
"Stemford Bric" stadionunda keçirilmiş qarşılaşma meydan sahiblərinin böyük hesablı qələbəsi ilə yekunlaşıb - 5:0.
"Çelsi" ilk yarıda 2, fasilədən sonra isə 4 qol vurub. Bu oyunda Ansi Aqollinin zədə üzündən meydana çıxmaması və arxa xətdə buraxılan kobud səhvlər öz sözünü deyib. Xüsusən, qapıçı İbrahim Şehiçin inamsız oyunu qeyd edilməlidir. Ön xətdə isə "Qarabağ" ciddi heç nə ilə yadda qalmayıb. Yalnız oyunun sonlarında Dino Ndlovu qol imkanı qazansa da, zərbəsi qapının üstündən keçib.
Beləliklə, "Qarabağ" Çempionlar Liqasında mübarizəyə böyük hesablı məğlubiyyətlə başlayıb.
Çempionlar Liqası, qrup mərhələsi
C qrupu
22:45. "Çelsi" (İngiltərə) - "Qarabağ" (Azərbaycan) - 6:0
Qollar: Pedro Rodriges, 5. Davide Zapakosta, 30. Sezar Azpilikueta, 55. Temu Bakayoko, 71. Miçi Batşuayi, 76. Maksim Medvedev, 81-öz qapısına
Baş hakim: Anastasios Sidiropulos
Yan xətt hakimləri: Polyxronis Kostaras, Lazaros Dimitriadis
Əlavə köməkçi hakimlər: Xaralambos Kaloqeropulos, Aleksandros Aretopulos
Dördüncü hakim: Damianos Eftimiadis (hamısı Yunanıstan)
Hakim-inspektor: Paulius Maljinskas (Litva)
UEFA nümayəndəsi: Mixal Martinyak (Slovakiya)
London, "Stemford Bric" stadionu
---------------------------------
Bu gün "Qarabağ" komandası Azərbaycan tarixində ilk dəfə futbol üzrə Çempionlar Liqasında 2017-2018 mövsümü üzrə qrup mərhələsində mübarizəyə başlayacaq.
Sportnet.az-ın məlumatına görə, Ağdam klubu İngiltərənin paytaxtı Londonda "Çelsi"nin qonağı olacaq. C qrupunda yer alan komandaların görüşü "Stemford Bric" stadionunda keçiriləcək və Bakı vaxtı ilə saat 22:45-də başlanacaq. Görüşü Tasos Sidiropulosun başçılıq etdiyi yunanıstanlı hakimlər briqadası idarə edəcək.
"Qarabağ" Çempionlar Liqasında mübarizəyə ardıcıl 4-cü mövsüm II təsnifat mərhələsindən başlayıb. Lakin əvvəlki 3 mövsümdən fərqli olaraq, Azərbaycan təmsilçisi bu dəfə Avropa Liqasının deyil, Çempionlar Liqasının qrup mərhələsinə yüksəlməyi bacarıb.
"Çelsi" isə qitənin ən nüfuzlu klub turnirinin müntəzəm iştirakçılarından olsa da, ötən mövsüm buna nail ola bilməyib. Səbəb "zadəganlar"ın 2015-2016 mövsümündə İngiltərə Premyer Liqasını 10-cu pillədə başa vurmasıdır. Məhz bu uğursuzluqdan sonra komandanın sükanı arxasına keçən Antonio Konte çempionluq sevinci yaşamağı bacarıb. Beləliklə, bu gün Azərbaycan və İngiltərə premyer liqalarının qızıl medalçıları qarşılaşacaqlar.
Qeyd edək ki, qrupun digər görüşündə İtaliya "Roma"sı İspaniya "Atletiko"su ilə üz-üzə gələcək.
