Zirə Olimpiya Kompleksinin stadionunun ot örtüyünün dəyişdiriləcəyi tarix müəyyənləşib.
Sportnet.az-ın məlumatına görə, bu barədə "Report”a arenada ev oyunlarını keçirən "Zirə” futbol klubunun mətbuat xidmətindən məlumat verilib. Bildirilib ki, stadionun süni qazonunun təbii ot örtüyü ilə əvəzlənməsinə iyulda start veriləcək: "Bu gün AFFA tərəfindən stadiona baxış oldu. Qazonunun dəyişdirilməsi prosesinə iyulda start veriləcəyi və oktyabrda başa çatacağı deyildi”.
Azərbaycan Premyer Liqasında 2018/2019 mövsümünə avqustda start veriləcəyi üçün "Zirə” rəqiblərini qəbul etməyə yeni stadion tapmalı olacaq. Hazırda bununla bağlı yekun qərar verilməsə də, ən optimal variant Mərdəkandakı "Dalğa Arena” hesab edilir.
Qeyd edək ki, stadionlarda süni qazonların təbii ot örtüyü ilə əvəzlənməsi AFFA-nın vəsaiti hesabına həyata keçirilir.
