"Avrokuboklarda ən vacib qələbələrimizi komandam ilk oyununu evdə keçirdiyi mərhələlərdə qazanmışıq".
Sportnet.az-ın məlumatına görə, bunu hazırda Qazaxıstanın "Astana" komandasına rəhbərlik edən "Qəbələ"nin sabiq baş məşqçisi Roman Qriqorçuk deyib. Ukraynalı mütəxəssis bildirib ki, Monteneqro "Sutyeska"sı ilə Çempionlar Liqasının I təsnifat mərhələsindəki ilk qarşılaşmanı harada oynamalarının fərqi yoxdur.
Qeyd edək ki, Roman Qriqorçukun dövründə "Qəbələ" Avropa Liqasında ardıcıl iki mövsüm qrup mərhələsinə vəsiqəni "pley-off"un cavab görüşlərindəki əlverişli nəticələri sayəsində əldə edib. 2015-2016 mövsümündə "qırmızı-qaralar" Yunanıstan "Panatinaikos"unu (ilk görüşdə Bakıda 0:0, cavab oyununda Afinada 2:2), 2016-2017 mövsümündə isə Sloveniya "Maribor"unu (ilk görüşdə evdə 3:1, cavab oyununda səfərdə 1:0) üstələdikdən sonra qrup mərhələsinə yüksəliblər.
