Futbol üzrə Azərbaycan yığması UEFA Millətlər Liqasında ilk oyununu keçirib.
Sportnet.az xəbər verir ki, D Liqasında 3-cü qrupun matçında rəqib Kosovo millisi olub.
Bakı Olimpiya Stadionunda təşkil olunmuş qarşılaşmada qalib müəyyənləşməyib - 0:0.
Matçın sakit keçən ilk yarısı ilə müqayisədə ikinci hissə daha maraqlı alınıb. Buna əvəzləmələrin də təsiri olub.
61-ci dəqiqədə Ruslan Qurbanov Təmkin Xəlilzadəyə, 66-cı dəqiqədə Emin Mahmudov Dmitri Nazarova, 74-cü dəqiqədə Ramil Şeydayev Rauf Əliyevə yerini verib.
69-cu dəqiqədə isə Azərbaycan millisinin hücumu zamanı top cərimə meydancası daxilində rəqib müdafiəçinin əlinə dəysə də, referi penalti təyin etməyib.
Bir neçə epizodda isə təhlükəli hücumları qolla tamamlamaq mümkün olmayıb.
Beləliklə, Azərbaycan millisi Qurban Qurbanovun rəhbərliyi altında ilk rəsmi matçından qolsuz bərabərliklə ayrılıb. Yanvarın 30-da Moldova ilə yoldaşlıq görüşünə təsadüf edən Qurbanovla ilk sınaqda da eyni hesab qeydə alınmışdı - 0:0.
-----------------------------------------------------------
Bu gün Azərbaycan yığma komandası UEFA Millətlər Liqasında ilk oyununu keçirəcək.
Sportnet.az xəbər verir ki, Qurban Qurbanovun rəhbərlik etdiyi kollektiv Bakı Olimpiya Stadionunda Kosovonu qəbul edəcək. Bu, həm də 46 yaşlı mütəxəssisin millinin sükanı arxasında ilk rəsmi matçı olacaq.
Ötən ilin noybarında baş məşqçi təyin olunan Q.Qurbanov bu müddətdə komandanı 6 yoldaşlıq görüşünə çıxarıb. Moldova (0:0) və Makedoniya (1:1) ilə heç-heçə edən yığma, Belarusla (0:1) Qazaxıstana (0:3) uduzsa da, Qırğızıstan (3:0) və Latviyanı məğlub edib (3:1).
Kosovo komandasının baş məşqçisi Bernar Şalland da postunda yenidir. Bu ilin martında işə başlayan 67 yaşlı isveçrəli mütəxəssis heyəti 3 yoldaşlıq oyununda sınayıb. Onun rəhbərlik etdiyi kollektiv Madaqaskar (1:0), Burkina Faso (2:0) və Albaniyaya (3:0) qalib gəlib.
2016-cı ilin mayında FİFA və UEFA-ya üzv qəbul olunan Kosovo yığması yalnız 2018-ci il dünya çempionatının seçmə mərhələsində iştirak edib. Səfərdə Finlandiyaya qarşı keçirdiyi ilk rəsmi matçda 1:1 hesablı heç-heçə edən kosovolular təsnifat mərhələsindəki digər 9 qarşılaşmada uduzublar. Cəmi 3 qol vuran yığma, 24 top buraxıb.
Hazırda FİFA reytinqində Azərbaycan millisi 1207 xalla 105-ci, Kosovo yığması isə 1080 xalla 141-ci yerdədir.
İlk dəfə təşkil olunan Millətlər Liqası AVRO-2020-yə vəsiqə qazanmaq üçün əlavə, eyni zamanda əla şansdır. Çünki UEFA-ya üzv olan 55 ölkənin yığma komandaları qitə futbol qurumunun reytinqində yer aldıqları mövqeyə uyğun olaraq 4 liqaya və səbətlərə bölünüblər. 1 – 12-ci yerlər A, 13 – 24-cü yerlər B, 25 – 39-cu yerlər C, 40 – 55-ci yerlər isə D liqasına düşüblər.
Bu liqaların qalibləri AVRO-2020-yə vəsiqə əldə edəcəklər. Qaliblər hər liqada qrup birinciləri arasında təşkil olunacaq "Dördlər finalı”nda müəyyənləşəcək. Burada bir matçdan ibarət yarımfinal və final olacaq.
Azərbaycan millisi Kosovo, Malta və Farer adaları yığmaları ilə birgə III qrupda yer alıb.
UEFA Millətlər Liqası
D Liqası, III qrup
7 sentybar
20:00. Azərbaycan - Kosovo - 0:0
Hakimlər: Ola Hobber Nilsen, Harald Qronevik, Oskar İsaksen, Simon Ytterland, Espen Andreas Eskas, Tom Harald Hagen (hakimlər briqadası Norveçdəndir)
Hakim-inspektor: Lusilio Kardozo Kortez Batista (Portuqaliya)
UEFA nümayəndəsi: Martin Sturkenboom (Hollandiya)
Bakı Olimpiya Stadionu
