AFFA İntizam Komitəsi I Divizionda V turun "Şüvəlan” – MOİK matçında baş verənlərlə bağlı qərarlarını açıqlayıb.
Sportnet.az-ın məlumatına görə, oyunun 90+2-ci dəqiqəsində "Şüvəlan” klubunun futbolçusu Elçin Əliyev ikinci sarı vərəqə alaraq meydandan kənarlaşdırılarkən rəqib futbolçuya qarşı qeyri-etik ifadələr işlətdiyinə görə 4 oyunluq cəzalandırılıb və klubuna 180 manat cərimə tətbiq olunub.
Qarşılaşmanın 90+3-cü dəqiqəsində MOİK-in futbolçusu Orxan Həsənov rəqibə qarşı təhqiredici ifadələr işlətdiyinə görə meydançadan qovulduğu üçün 3 matçlıq cəzaya məruz qalıb, klub isə 160 manat məbləğində cərimə olunub.
Həmçinin qonaq komandanın 5 futbolçusu sarı vərəqə ilə cəzalandığı üçün klub əlavə olaraq 80 manat ödəməli olacaq.
Qeyd edək ki, qarşılaşma MOİK-in 1:0 hesablı qələbəsi ilə yekunlaşıb.
