"Nəsə demək çox çətindir. Mənim burada 3-cü oyunum idi. İki vacib görüşdə məğlub olduq. Hələ ki, oyunum haqda yaxşı bir şey deyə bilmərəm. Son iki görüş çox da pozitiv keçmədi. Ona görə də nəsə söyləyə bilmərəm".
Sportnet.az-ın məlumatına görə, bunu "Keşlə"nin yeni transferi Aleksandr Kriştovao səfərdə "Neftçi"yə 1:3 hesabı ilə uduzduqları Azərbaycan Premyer Liqasının XVII tur matçından sonra deyib. Anqolalı hücumçu digər sualları da cavablandırıb...
- Çempionata tez alışa bildinizmi?
- Əlbəttə ki, asan deyil. Mövsümün ortasında komandaya gəlmək və tez alışmaq, elə də asan deyil. Amma bu, mənim işimdir. Əlimdən gələni etməyə çalışacağam ki, komandaya tez bir zamanda daha çox fayda verim.
- "Keşlə"yə gəlməmişdən öncə "Sabah"ın düşərgəsində baxışda olmuşdunuz, hətta, bəyənilmişdiniz. Bizdə olan məlumata görə maliyyə məsələsinə görə anlaşma olmamışdı. Ümumiyyətlə, "Sabah"a keçid niyə alınmamışdı?
- Daha yaxşı təklif gözləyirdim. Mənim üçün çox da rahat deyildi. "Dinamo" (Buxarest) ilə müqavilə bağlamağı daha üstün tutdum.
- Azərbaycan Premyer Liqasına uyğunlaşmaq üçün nə qədər vaxt lazımdır?
- Bu barədə bir söz deyə bilmirəm. Mənim üçün hazırda ən vacibi tez bir zamanda uyğunlaşmaqdır.
- İndi "Keşlə"nin vuran ayağı Lorenso Frutosdur. Özünüzü onunla rəqabət aparmağa hazır sayırsınız?
- Frutos "Keşlə"nin əsas futbolçularından biridir. Onun burada olması məni daha yaxşı edir. Öz üzərimdə daha çox çalışıram. Kim əsas heyətdə oynayır, kim ehtiyatda qalır, bu, sadəcə məşqçinin qərarıdır. Mən öz oyunuma fikir verirəm. Daha yaxşı olmağa çalışıram ki, əsas heyətdə yerimi qazanım.