UEFA Çempionlar Liqasında mövsümün koronavirus pandemiyası səbəbindən yarımçıq qalmış hissəsi bərpa olunub.
Sportnet.az-ın məlumatına görə, 1/8 final mərhələsinin növbəti cavab görüşlərində "Mançester Siti" İngiltərədə İspaniya çempionu "Real Madrid"i, İtaliya çempionu "Yuventus" isə Fransa "Lion"unu qəbul edib. Hər iki qarşılaşma meydan sahiblərinin eyni hesablı qələbəsi ilə yekunlaşıb.
"Mançester Siti"dən ilk qolu 9-cu dəqiqədə Rəhim Sterlinq vurub. 28-ci dəqiqədə Kərim Benzema hesabı bərabərləşdirib. Lakin 68-ci dəqiqədə Qabriel Jezus "şəhərlilər"i yenidən önə çıxarıb. Beləliklə, "Mançester Siti" ilk görüşdə olduğu kimi, yenə 2:1 hesablı qələbə qazanıb.
"Yuventus" isə hələ 12-ci dəqiqədə qapısında qol görüb. Memfis Depay dəqiq penalti zərbəsi ilə hesabı açıb. Turin komandası Kriştianu Ronaldunun 43-cü dəqiqədə penalti ilə və 60-cı dəqiqədə vurduğu qollarla nəticəni öz xeyrinə dəyişə bilib. Lakin 2:1 hesablı qələbə "Qoca Sinyora"ya kömək etməyib. "Şirlər" ilk matçda öz meydanında 1:0 hesabı ilə qalib gəldikləri üçün səfər qolu sayəsində mərhələ adlayıblar.
1/4 finalda "Mançester Siti" "Lion"a rəqib olub. Daha əvvəl Almaniya "Leyptsiq"inin İspaniya "Atletiko"su ilə, İtaliya "Atalanta"sının isə Fransa PSJ-si ilə üz-üzə gələcəyi məlum idi.
Qeyd edək ki, 1/8 final mərhələsinə avqustun 8-də "Barselona" (İspaniya) - "Napoli" (İtaliya) və "Bavariya" (Almaniya) - "Çelsi" (İngiltərə) matçları ilə yekun vurulacaq.
---------------------------------
UEFA Çempionlar Liqasında koronavirus pandemiyası səbəbindən təxirə salınmış 2019/2020 mövsümü bu gün qaldığı yerdən davam edəcək.
Sportnet.az-ın məlumatına görə, Avropanın bir nömrəli klub turniri 1/8 final mərhələsinin cavab görüşləri ilə bərpa olunacaq.
4 matçdan yarısı ilk oyun günündə, yarısı isə avqustun 8-də baş tutacaq. "Yuventus" Fransadakı ilk qarşılaşmada minimal hesabla uduzduğu "Lion"dan bunun əvəzini İtaliyada çıxmağa çalışacaq.
Gecənin digər qarşılaşmasında İspaniya "Real Madrid"i ilə İngiltərə təmsilçisi "Mançester Siti" münasibətlərinə aydınlıq gətirəcəklər. Madrid səfərində 2:1 hesablı qələbəyə sevinən "şəhərlilər" üstünlüklərini qorumaq niyyətindədirlər.
Sabah isə "Bavariya" (Almaniya) - "Çelsi" (İngiltərə) və "Barselona" (İspaniya) - "Napoli" (İtaliya) oyunları keçiriləcək.
Çempionlar Liqası
1/8 final mərhələsi, cavab oyunları
7 avqust
23:00. "Yuventus" (İtaliya) - "Lion" (Fransa) - 2:1
Qollar: Kriştianu Ronaldu, 43 (pen.); 60 - Memfis Depay, 12 (pen.)
İlk oyun - 0:1
23:00. "Mançester Siti" (İngiltərə) - "Real Madrid" (İspaniya) - 2:1
Qollar: Rəhim Sterlinq, 9. Qabriel Xesus, 68 - Kərim Benzema, 28
İlk oyun - 2:1
Qeyd edək ki, Çempionlar Liqasının qarşılaşmaları 1/4 finaldan "8-lər finalı" formatında Portuqaliyanın paytaxtı Lissabonda oynanılacaq.
