UEFA Avropa Liqasında 1/4 final mərhələsinə yekun vurulub.
Sportnet.az-ın məlumatına görə, bununla da növbəti raunda adlayan komandalar müəyyənləşib.
İngiltərənin "Mançester Yunayted" və "Arsenal", İspaniyanın "Vilyarreal" və İtaliyanın "Roma" klubları yarımfinala vəsiqə qazanıblar.
"Qırmızı şeytanlar" İspaniyada qalib gəldiyi "Qranada"nı evdə də eyni hesabla məğlub edib. "Topçular" isə Londonda 1:1 hesablı heç-heçəyə razılaşdığı Çexiyanın "Slaviya" (Praqa) komandasını səfərdə darmadağın edib - 4:0.
"Roma" İtaliyada Niderland "Ayaks"ı ilə bərabərə qalıb - 1:1. İlk oyunda 2:1 hesablı qələbə qazanan "canavarlar" iki görüşün nəticəsinə əsasən, adını növbəti mərhələyə yazdırıb.
"Vilyarreal" isə İspaniyada Xorvatiyanın "Dinamo" (Zaqreb) klubuna heç bir şans verməyib. Səfər oyununda minimal hesablı qələbəyə sevinən La Liqa təmsilçisi evdə də rəqibini məğlub edib.
Qeyd edək ki, yarımfinalda "Mançester Yunayted" "Roma" ilə, "Arsenal" isə "Vilyarreal"la qarşılaşacaq. Bu mərhələnin oyunları 29 aprel - 6 mayda olacaq.
-------------------
Bu gün UEFA Avropa Liqasında 1/4 final mərhələsinin cavab görüşləri keçiriləcək. Sportnet.az-ın məlumatına görə, eyni gündə oynanılacaq cavab qarşılaşmalarından sonra yarımfinala vəsiqələrin sahibləri bəlli olacaq.
Gecənin maraqlı oyunlarından biri İtaliyada baş tutacaq. Niderlandda "Ayaks"a 2:1 hesabı ilə qalib gəlmiş "Roma" cavab qarşılaşmasında üstünlüyünü qorumağa çalışacaq.
"Mançester Yunayted" İngiltərədə İspaniya "Qranada"sını sınağa çəkəcək. İlk görüşdə 2:0 hesablı qələbə qazanmış "qırmızı şeytanlar" cütün taleyini demək olar ki, həll ediblər.
"Qarabağ"la eyni qrupda mübarizə aparmış İspaniya "Vilyarreal"ının da yarımfinala adlamaq üçün yaxşı şansı var. Xorvatiyada Zaqreb "Dinamo"sunu minimal hesabla məğlub etmiş La Liqa təmsilçisinə evdə heç-heçə də sərf edəcək.
İngiltərənin "Arsenal" klubu isə Çexiyada Praqa "Slaviya"sı ilə üz-üzə gələcək. Londondakı qarşılaşmada qələbəni son saniyələrdə əldən vermiş "topçular" mərhələni keçmək üçün səfərdə ən azı 2 qollu heç-heçə etməlidirlər.
UEFA Avropa Liqası
1/4 final, cavab oyunları
15 aprel
23:00. "Vilyarreal" (İspaniya) - "Dinamo" (Zaqreb, Xorvatiya) - 2:1
Qollar: Pako Alkaser, 36, Jerar Moreno, 43 - Mislav Orşiç, 74
İlk oyun - 1:0
23:00. "Roma" (İtaliya) - "Ayaks" (Niderland) - 1:1
Qollar: Edin Ceko, 72 - Brayan Brobbi, 49
İlk oyun - 2:1
23:00. "Slaviya" (Praqa, Çexiya) - "Arsenal" (İngiltərə) - 0:4
Qollar: Emil Smit-Rou, 14, Aleksandr Lyakazett, 21 (penalti); 77, Bukayo Saka, 24
İlk oyun - 1:1
23:00. "Mançester Yunayted" (İngiltərə) - "Qranada" (İspaniya) - 2:0
Qollar: Edinson Kavani, 6, Xesus Valyexo, 90 (öz qapısına)
İlk oyun - 2:0
