"Neftçi" UEFA Çempionlar Liqasının II təsnifat mərhələsinin cavab oyununda Yunanıstan "Olimpiakos"u ilə qarşılaşıb.
Sportnet.az-ın məlumatına görə, "Bakcell Arena"da keçirilən görüş flaqmanın 0:1 hesablı məğlubiyyəti ilə başa çatıb.
Hər iki komanda matça ciddi itkilərlə çıxıblar. Qonaqların heyətində 8 futbolçu oyunu buraxıb. "Ağ-qaralar"da isə Namik Ələskərov zədə, Mert Çelik cəza səbəbindən oynamayıb. Ələskərovun yoxluğunda baş məşqçi Samir Abasov hücumda yarımmüdafiəçi Sezar Meza Kolliyə şans verib.
"Neftçi" azarkeşlərin möhtəşəm dəstəyi ilə oyuna sürətli başlayıb. İlk dəqiqələrdən meydanın rəqibə aid hissəsində pressinq edən paytaxt təmsilçisi 3-cü dəqiqədə qola yaxın olsa da, Meza Kollinin uzaq məsafədən zərbəsini qapıçı Konstantinos Tsolakis çətinliklə dəf edib. 15-ci dəqiqədə isə əvvəlcə Ömər Buludov, daha sonra Mamadu Mbocun kobud səhvindən sonra qonaqlar hesabı açıblar. Pirey təmsilçisinin heyətində Giorqos Masuras fərqlənib. Müdafiədəki çaşqınlıq buraxılan qoldan sonra da davam edib. Epizodların birində Ömər Buludov topu başla qapıçısı Aqil Məmmədova ötürmək istəyərkən az qala avqotol müəllifi olacaqdı. 30-cu dəqiqədə “Neftçi”nin heyətində məcburi əvəzetmə gerçəkləşib. Zədələnən Buludovun yerinə meydana Mirabdulla Abbasov daxil olub. Bundan sonra Harramiz Soareş müdafiənin sağ cinahına keçib. Abbasov meydana çıxdıqdan cəmi 6 dəqiqə sonra qol vurmaq üçün yaxşı fürsət yaxalasa da, müdafiəçilər hesabın bərabərləşməsinə imkan verməyiblər. Ardınca Sabir Buqrinin yerlə qüvvətli zərbəsində dəqiqlik çatmayıb. 44-cü dəqiqədə yerli azarkeşlər Vətən müharibəsi ilə bağlı “Şəhidlər ölməz, Vətən bölünməz” şüarları səsləndiriblər, həmçinin hərbi salam veriblər. İlk hissə qonaqların minimal hesablı üstünlüyü ilə başa çatıb.
İkinci yarıya hər iki komanda ehtiyatlı başlayıb. 55-ci dəqiqədə Meza Kollinin uzaq məsafədən vurduğu top qapıdan xeyli aralı keçib. Az sonra Aqil Məmmədov ardıcıl 2 künc zərbəsi zamanı komandasını real qoldan xilas edib. “Neftçi” 70-ci dəqiqədən sonra təzyiqi artırsa da, bu, hesabda öz əksini tapmayıb. Matçın sonlarına doğru sağ cinahdan ötürülən topa Laval istədiyi kimi toxuna bilməyib. Görüşün sonunca dəqiqəsində Fəhmin Muradbəylinin vurduğu top az fərqlə qapı dirəyinin yanından keçib.
Beləliklə, ilk oyundakı kimi, cavab görüşündə də rəqibinə 0:1 hesabı ilə uduzan “Neftçi” Çempionlar Liqasında mübarizəni dayandırıb. “Ağ-qaralar” yoluna Avropa Liqasında davam edəcək. Paytaxt təmsilçisi III təsnifat mərhələsində Finlandiyanın HİK (Helsinki) klubu ilə qarşılaşacaq. Flaqman ilk oyunu avqustun 5-də evdə, cavab matçını isə bir həftə sonra səfərdə keçirəcək.
---------------------------
"Neftçi" bu gün UEFA Çempionlar Liqasında növbəti oyununu keçirəcək.
Sportnet.az-ın məlumatına görə, "ağ-qaralar" II təsnifat mərhələsinin cavab matçında Yunanıstan "Olimpiakos"u ilə qarşılaşacaq. "Bakcell Arena"dakı görüş saat 21:00-da başlayacaq. Qarşılaşmanı ispaniyalı FIFA referisi Rikardo de Burqos idarə edəcək.
Hər iki komanda oyuna ciddi itkilərlə çıxacaq. Flaqmanın heyətində ilk görüşdə ağır zədə almış Namik Ələskərov ilk qarşılaşma qırmızı vərəqə alan Mert Çelik oynaya bilməyəcək. Pirey təmsilçisində isə 8 itki var. Andreas Buxalakis, Oleq Ryabçuk, Sokratis Papastatopulos, Tanasis Andrutsos, Məhəmməd Kamara, Tikinyo, Yan M Vila və Eqmundur Kristinsson matçı buraxacaqlar. Onlardan M. Kamara cəza, digərləri isə zədə səbəbindən Azərbaycan paytaxtına gətirilməyib.
Qeyd edək ki, ilk görüşdə "Neftçi" rəqibinə 0:1 hesabı ilə uduzub. Bu cütün qalibi növbəti mərhələdə “Mura” (Sloveniya) - “Lüdoqorets” (Bolqarıstan) oyununun güclüsü ilə üz-üzə gələcək. Uduzan tərəf isə UEFA Avropa Liqasının III raundunda HİK (Finlandiya) ilə qarşılaşacaq.
UEFA Çempionlar Liqası, II təsnifat mərhələsi
Cavab oyunu
28 iyul
21:00. "Neftçi" - "Olimpiakos" (Yunanıstan) - 0:1
Qol: Giorqos Masuras, 15
Hakimlər: Rikardo de Burqos, Roberto del Palomar, Yon Nunyes, Adrian Kordero (İspaniya)
Bakı. "Bakcell Arena"
İlk oyun - 0:1
