Futbol üzrə Azərbaycan Premyer Liqasında III turun daha bir oyunu keçirilib.
Sportnet.az-ın məlumatına görə, "Keşlə" "ASK Arena"da "Zirə" ilə qarşılaşıb. Görüş qonaqların 2:0 hesablı qələbəsi ilə başa çatıb.
Qonaqların heyətində hər iki qolu ikinci hissədə Davit Volkov vurub. Gürcüstanlı hücumçu 64 və 72-ci dəqiqələrdə fərqlənib.
28-ci dəqiqədə meydan sahibləri azlıqda qalıblar. Rəqibin müdafiəçisi Nemanya Ancelkoviçin qarın nahiyyəsinə zərbə endirən Anatole Abanq birbaşa qırmızı vərəqə ilə meydandan qovulub.
Yeni mövsümdə ilk qələbəsini qazanan "Zirə" xallarının sayını 4-ə çatdıraraq, 5-ci pilləyə yüksəlib. Xalı olmayan "Keşlə" isə "Sabah"la birlikdə 7-8-ci yerləri bölüşdürür. Yeri gəlmişkən, "Sabah" turun açılış matçında evdə "Qəbələ"yə 0:2 hesabı ilə uduzub.
Qeyd edək ki, tura "Sabah" keçiriləcək "Səbail" - "Sumqayıt" və "Neftçi" - "Qarabağ" matçları ilə yekun vurulacaq.
-----------------------------------
Futbol üzrə Azərbaycan Premyer Liqasında III tura start verilib.
Sportnet.az-ın məlumatına görə, açılış oyununda "Sabah" "Qəbələ"ni qəbul edib. Masazırdakı "Bank Resbublika Arena"da keçirilən görüş qonaqların 2:0 hesablı qələbəsi ilə yekunlaşıb.
"Qırmızı-qaralar"ın heyətində qolları 53-cü dəqiqədə Yaovi Akakpo, qarşılaşmanın əsas vaxta əlavə olunmuş 3-cü dəqiqədə isə Ülvi İsgəndərov vurublar.
Oyunun 82-ci dəqiqəsində qonaqların kapitanı Asif Məmmədov, matçın 90+1-ci dəqiqəsində isə meydan sahiblərinin yeni transferi İldar Alekperov zədələnərək, meydanı tərk ediblər.
Bu nəticədən sonra xallarını 7-yə çatdıran "Qəbələ" liderliyə yüksəlib. 3 turdan sonra xalı olmayan "Sabah" isə sonuncudur. Paytaxt təmsilçisi cari mövsümdə qol da vura bilməyib.
Qeyd edək ki, günün digər oyununda "Keşlə" və "Zirə" komandaları üz-üzə gələcəklər. Tura sentyabrın 12-də oynanılacaq "Səbail" - "Sumqayıt" və "Neftçi" - "Qarabağ" matçları ilə yekun vurulacaqa.
----------------------------------
Bu gün futbol üzrə Azərbaycan Premyer Liqasında III tura start veriləcək.
Sportnet.az-ın məlumatına görə, ilk oyun günündə iki qarşılaşma keçiriləcək.
Tur "Sabah" - "Qəbələ" matçı ilə başlayacaq. Əyalət təmsilçisi 4 xalla 2-4-cü yerləri bölüşdürür. Hər iki görüşdə uduzan paytaxt klubu isə sonuncu - 8-ci pillədə qərarlaşıb. Komandalar indiyədək Premyer Liqada 11 dəfə üz-üzə gəliblər. Bunların 5-də "Sabah", 4-də isə qonaqlar qələbə qazanıb. Topların fərqində də meydan sahibləri üstünlüyə malikdir - 14:11.
Günün digər qarşılaşmasında "Keşlə" "Zirə"ni qəbul edəcək. Meydan sahibləri keçirdiyi hər iki görüşdə məğlub olub. Qonaqlar isə 1 xalla 6-cı sıradadır. Paytaxt təmsilçiləri çempionatda 23 dəfə qarşılaşıb. Bunların 6-də "Keşlə", 7-də isə "Zirə" 3 xal qazanıb. Topların fəriqində qonaqların minimal üstünlüyü var - 28:27.
Azərbaycan Premyer Liqası, III tur
18:00. “Sabah” – “Qəbələ” - 0:2
Qollar: Yaovi Akakpo, 53, Ülvi İsgəndərov, 90+3
Hakimlər: Rauf Cabarov, Namiq Hüseynov, Müslüm Əliyev, Kamranbəy Rəhimov
Hakim-inspektor: Zöhrab Qədiyev
AFFA nümayəndəsi: Əsgər Əmirəliyev
“Bank Respublika Arena".
20:15. “Keşlə” –“Zirə” - 0:2
Qollar: Davit Volkov, 64; 72
Hakimlər: Əliyar Ağayev, Zeynal Zeynalov, Akif Əmirəli, Rövşən Rəcəbov
Qırmızı vərəqə: Anatol Abanq, 28 ("Keşlə")
Hakim-inspektor: Ramil Diniyev
AFFA nümayəndəsi: Ramiz Mustafayev
“ASK Arena".
Qeyd edək ki, III turun "Səbail" - "Sumqayıt" və "Neftçi" - "Qarabağ" oyunları sentyabrın 12-də olacaq.
