"Bizə dəstək olan hər kəsə təşəkkür edirəm. Azarkeşlərin qələbəmizdə böyük rolu oldu. İlk dəqiqədən hücumlar etdik və qollar vurmağa çox yaxın idik. Ancaq qol şanslarından yararlana bilmirdik. Bu da çətin qələbə qazanmağımıza gətirib çıxardı. Bosniyalılar bizə qarşı yaxşı mübarizə göstərdi". Bunu Sportnet.az-a açıqlamasında Fineo de Araujo deyib.
Futzal üzrə milli komandamızın formasını geyinən Fineo qrupun ikinci görüşündən də qalib ayrılmaq istədiklərini deyib. O, Albaniya millisinin ilk görüşdə çox yaxşı təsir bağışladığını dilə gətirib: "Albaniya millisi heç də zəif deyil. Bosniya və Herseqovina millisi kimi onlar da bizə qarşı sona kimi mübarizə aparacaqlar. Albaniyanın Macarıstana qarşı keçirdiyi oyunu izlədim. Həqiqətən də güclü komandadır. Amma bizim məqsədimiz qrup birinciliyi olduğundan bütün görüşlərdən qalib ayrılmalıyıq”.
