Şahin Diniyev Braziliyanı erkən yola saldı

Azərbaycan yığma komandasının sabiq baş məşqçisi Şahin Diniyev DÇ-2014-ün 1/8 final cütlükləri ilə bağlı proqnoz verib. Sportnet.az-ın məlumatına görə, təcrübəli mütəxəssis elə ilk oyundan sensasiya gözlədiyini bildirib.

Braziliya – Çili

-Meydan sahiblərinin məğlub olacağını gözləyirəm. Daxili bir hiss mənə Çilinin qalib gələcəyini deyir. Braziliya yığması daha çox fərdi oyuna üstünlük verir. Luis Felipe Skolarinin yetirmələri daha çox Neymarın ustalığına bel bağlayırlar. Çili millisi isə pressinq tətbiq edir, kollektiv oyuna üstünlük verir və komanda şəklində müdafiə olunmağı bacarır.

Kolumbiya – Uruqvay

-Üstünlüyü Kolumbiyaya verirəm. Hesab edirəm ki, Uruqvay qrupda daha çox enerji sərf etdi. Məhz bu amilin həlledici rol oynayacağını düşünürəm. Demirəm ki, Kolumbiya rahatlıqla rəqibini üstələyəcək. Hətta ola bilər ki, görüş penalti seriyasınadək davam etsin. Ancaq bütün hallarda sevinən tərəfin Kolumbiya olacağını proqnozlaşdırıram.

Hollandiya – Meksika

-Deyərdim finala bərabər görüş izləyəcəyik. Hər iki komanda parlaq futbol sərgiləyir. Bu oyuna baxıb, zövq almaq lazımdır. Hər iki tərəf ən xoş sözlərə layiqdir. Şanslara gəlincə, tam bərabərsəviyyəli iki komandanın mübarizəsini izləyəcəyimizi söyləyə bilərəm.

Kosta Rika – Yunanıstan

-Kosta Rikanı daha şanslı sayıram. Yunanıstan daha çox yaşlı futbolçulara güvənən bir heyətə malikdir. Düşünürəm ki, Kosta Rikanın təklif edəcəyi temp qarşısında onlar aciz qalacaqlar.

Fransa – Negeriya

-Zənnimcə, bu oyunda Fransa heç bir çətinlik çəkməyəcək. Afrikalıların müdafiə xəttində nəzərəçarpacaq boşluqlar var. Fransa yığması isə mobil futbol sərgiləyir. Avropalıların hücum xəttinin Nigeriyanın bu cür müdafiəsini yaracağını düşünürəm.

Almaniya – Əlcəzair

-Almaniya nəinki bu oyunun, ümumiyyətlə, DÇ-2014-ün favoritidir. Qrup mərhələsində nümayiş etdirdikləri futbol onlara qızıl medallara ən real namizəd kimi baxmağıma əsas verir.

Argentina – İsveçrə

-Birmənalı şəkildə Argentinanın qalib gələcyini bildirirəm. Cənubi amerikalılar hələ öz sözlərini deməyiblər. Hesab edirəm ki, Messinin komandası oyundan-oyuna artıracaq. İsveçrənin ¼ finala çıxacağına inanmıram.

Belçika – ABŞ

-İki bərabərsəviyyəli komandanın oyunudu. Ola bilər, əsas vaxtda heç-heçə qeydə alınsın. Ancaq əlavə vaxtda olsa da, belçikalıların minimal fərqlə qalib gələcəyini düşünürəm.