Slovakiyanın Snina şəhərində yeniyetmə güləşçilər arasında dünya çempionatı start götürüb. Sportnet.az-ın məlumatına görə, çempionatın ilk günündə Azərbaycan yığması 1 medal qazanıb.
100 kq çəki dərəcəsində mübarizə aparan yunan-Roma güləşçimiz Cavid Feyziyev bütün rəqiblərini üstələyərək finala yüksəlib. Finala qədər güləşçimiz Çexiya, Polşa, Belarus və Rusiya təmsilçilərini mübarizədən kənarlaşdırıb. Həlledici görüşdə onun rəqibi Gürcüstan idmançısı Zviad Pataridze olub. Feyziyev 0:7 hesabı ilə məğlub olaraq, gümüş medalla kifayətlənib.
Qeyd edək ki, daha 4 çəkidəki təmsilçilərimiz - Kənan Cəfərov (50 kq), Orxan Ağamalıyev (54 kq), Murad Allahverdiyev (58 kq) və Ülvi Qənizadə (63 kq) mükafatçılar sırasına düşə bilməyiblər.
