"Qalib gəldiyim üçün çox şadam. Xüsusən son 7 km məsafə çətin oldu. Buna baxmayaraq qalib oldum".
Sportnet.az-ın məlumatına görə, bunu "Tour dAzerbaidjan"ın ikinci mərhələsinin qalibi olan "Synergy Baku" komandasının velosipedçisi Kirill Pozdnyakov deyib.
Rusiyalı legioner bildirib ki, bugünkü mərhələ onun üçün çox vacib idi: "Ümumi təsnifatda liderliyə yüksəlmək istəyirdim. Əlimdən gələni etdim ki, qalib oldum. Sona doğru gücümü səfərbər edərək birinci yeri tutdum. Çalışacağam ki, lider köynəyini sonadək qoruyum. Məqsədimiz ümumi təsnifatda qalib olmaqdır. Dördüncü mərhələdə də özümü şanslı görürəm".
