Almaniyanın Dortmund şəhərində start götürən gənclər arasında Avropa çempionatının ilk yarış günündə Azərbaycan sərbəst güləşçiləri 3 medal qazanıblar.
Sportnet.az-ın məlumatına görə, medallardan biri qızıl, biri gümüş, biri isə bürünc əyarlı olub.
Fəxri kürsünün ən yüksək pilləsinə 60 kq çəki dərəcəsində yarışan Əli Rəhimzadə qalxıb. O, Ermənistan, Rusiya və Moldovadan olan rəqiblərini üstələdikdən sonra həlledici görüşdə ukraynalı Andrey Yatsenko ilə qarşılaşıb. Rəhimzadə 8:7 hesabı ilə qalib gələrək, Avropa çempionu olub.
50 kq çəkidə mübarizə aparan Şahin Muxtarov ardıcıl olaraq Fransa və Almaniyadan olan rəqiblərini məğlub edərək finala yüksəlib. Həlledici görüşdə o, rusiyalı Muxammadxon Muxammadxona 1:6 hesabı ilə uduzaraq, gümüş medalla kifayətlənib.
Nəhayət, 96 kq-da yer alan Məhəmmədrəsul Qazıməhəmmədov ilk görüşündə macarıstanlı rəqibinə qalib gəlsə də, 1/4 finalda gürcüstanlı pəhləvana uduzub. Lakin rəqibinin finaladək irəliləməsi səbəbindən Qazıməhəmmədov təsəlliverici görüşlərə qatılıb. O, ardıcıl olaraq, yunanıstanlı və türkiyəli rəqiblərini üstələyərək, bürünc medalçı olub.
Avropa çempionatı
27 iyun
50 kq
1/4 final. Şahin Muxtarov - Valentin Damur (Fransa) - 11:0
1/2 final. Horst Lehr (Almaniya) - Şahin Muxtarov - 6:7
FİNAL. Şahin Muxtarov - Muxammadxon Muxammadxon (Rusiya) - 1:6
60 kq
1/8 final. Vardges Karapetyan (Ermənistan) - Əli Rəhimzadə 6:6*
1/4 final. Abdulla Axmedov (Rusiya) - Əli Rəhimzadə - 7:7*
1/2 final. Vitali Buniki (Moldova) - Əli Rəhimzadə - 4:16
FİNAL. Əli Rəhimzadə - Andrey Yatsenko (Ukrayna) - 8:7
74 kq
1/8 final. Rüstəm Maqomedov (Rusiya) - Abubakr Abakarov - 3:2
Təsəlliverici görüş. Abubakr Abakarov - Axsarbek Qulayev (Slovakiya) - 1:3
96 kq
1/8 final. Patrik Şurovski (Macarıstan) - Məhəmmədrəsul Qazıməhəmmədov - 0:7
1/4 final. Məhəmmədrəsul Qazıməhəmmədov - Givi Matçaraşvili (Gürcüstan) - 7:15
Təsəlliverici görüş. Dimitrios Akritidis (Yunanıstan) - Məhəmmədrəsul Qazıməhəmmədov - 0:10
Bürünc medal görüşü. Məhəmmədrəsul Qazıməhəmmədov - İbrahim Çiftçi (Türkiyə) - 11:1
