Yenidən sərbəst güləş üzrə Azərbaycan milli komandasına baş məşqçi təyin olunan Saypulla Absaidov federasiyanın rəsmi saytına açıqlama verib.
Sportnet.az xəbər verir ki, məsuliyyətli işin altına girdiyini söyləyən təcrübəli mütəxəssis qarşıya qoyulan hədəflərdən də danışıb.
"Federasiya rəhbərliyi yenidən bu vəzifəyə məni layiq gördüyü üçün şadam və minnətdaram. Çox məsuliyyətli bir vəzifə həvalə olunub" deyən dağıstanlı mütəxəssis məqsədlərinə çatmağa qadir olduqlarını vurğulayıb: "Növbəti il dünya çempionatı lisenziya xarakteri daşıyır. Biz Qazaxıstanın paytaxtı Astanada keçiriləcək mundialda olimpiadaya vəsiqələr əldə etməliyik. İndi iş planı və hazırlıq sistemi haqqında fikirləşirəm. 2019-cu ilə müxtəlif beynəlxalq turnirlərlə başlayacağıq. Apreldə Avropa çempionatı, iyunda isə II Avropa Oyunlarına qatılacağıq. Sözsüz ki, əsas məqsəd sentyabrda keçiriləcək dünya çempionatında uğurlu çıxış etməkdir. Hədəflərimiz dəyişilməz qalır. Yaxşı məşqçilərimiz var. Heyətimiz də kifayət qədər güclüdür. Komandamızda həm təcrübəli, həm də böyük perspektiv vəd edən gənc güləşçilər var. Belə kollektivlə rəhbərliyin qarşımıza qoyduğu hədəfə çata bilərik".
Qeyd edək ki, Saypulla Absaidov baş məşqçi postunda Firdovsi Umudovu əvəzləyib.
