Rumıniyanın Konstanta şəhərində çimərlik güləşi üzrə Dünya Seriyasının final mərhələsi keçirilib.
Sportnet.az xəbər verir ki, yarışda Azərbaycanı üç güləşçi təmsil edib. Onların hər üçü fəxri kürsüyə qalxıb.
80 kq çəki dərəcəsində yer alan Omid Kamaliağdam C qrupunda Rumıniyanın 2 güləşçisinə qalib gəldikdən sonra Portuqaliya idmançısını üstələyərək yarımfinala yüksəlib. Finalın bir addımlığında Ukrayna təmsilçisinə məğlub olan Kamaliağdam Rumıniyadan olan rəqibinə növbəti dəfə qalib gələrək Dünya Seriyasının sonuncu - 4-cü mərhələsini bürünc medalla başa vurub.
90 kq çəkidəki İbrahim Yusubov təsnifatda Yunanıstan güləşçisini mübarizədən kənarlaşdıraraq qrup mərhələsinə yüksəlib. Yunanıstanın daha bir təmsilçisinə qalib gəldikdən sonra Pakistan idmançısına uduzan Yusubov Ukrayna pəhləvanından güclü olmaqla yarımfinala vəsiqə qazanıb. O, türkiyəli rəqibinə xal vermədikdən sonra həlledici görüşdə gürcüstanlı həmkarını məyus edərək qızıl medala sahib çıxıb.
A qrupunda mübarizəyə start verən Oyan Nəzəriani (+90 kq) Yunanıstanın 2 güləşçisi ilə yanaşı, İtaliya idmançısına heç bir şans tanımayıb. Yarımfinalda Rumıniya təmsilçisinə gücünü göstərən Nəzəriani finalda Gürcüstan pəhləvanını da məğlub edərək turnirin baş mükafatına yiyələnib. Nəzəriani həm də yarışın ən yaxşı fəndini edən güləşçi kimi xüsusi mükafata sahib çıxıb.
80 kq
C qrupu
1-ci görüş: Omid Kamaliağdam – Vasile Minzala (Rumıniya) 3:1
2-ci görüş: Omid Kamaliağdam – Radu Huhulea (Rumıniya) 3:0
3-cü görüş: Omid Kamaliağdam – Edmilson Qomes (Portuqaliya) 3:0
1/2 final: Omid Kamaliağdam – Vasili Mixaylov (Ukrayna) 1:3
Bürünc medal görüşü: Omid Kamaliağdam – Vasile Minzala (Rumıniya) 3:1
90 kq
Təsnifat: İbrahim Yusubov – Georgios Tsaknakis (Yunanıstan) 2:1
B qrupu
1-ci görüş: İbrahim Yusubov – Mixeil Tsikovani (Yunanıstan) 3:0
2-ci görüş: İbrahim Yusubov – Məhəmməd İnam (Pakistan) 0:3
3-cü görüş: İbrahim Yusubov – Aleksey Yakovçuk (Ukrayna) 3:1
1/2 final: İbrahim Yusubov – Mahmut Seyfi Özkaya (Türkiyə) 3:0
Final: İbrahim Yusubov – Dato Marsaqişvili (Gürcüstan) 3:1
+90 kq
A qrupu
1-ci görüş: Oyan Nəzəriani – Konstantinos Fotiadis (Yunanıstan) 5:0
2-ci görüş: Oyan Nəzəriani – Axilles Xrisidis (Yunanıstan) 5:1
3-cü görüş: Oyan Nəzəriani – Eduardo Qiqliotti (İtaliya) 3:0
1/2 final: Oyan Nəzəriani – Vasile Karas (Rumıniya) 3:0
Final: Oyan Nəzəriani – Mamuka Kordzaya (Gürcüstan) 2:0
Qeyd edək ki, Dünya Seriyasının final mərhələsində beynəlxalq dərəcəli hakim Sədi Quliyev ədaləti qoruyub.
