Azərbaycanda "İnter" (indiki "Şamaxı") və "Qəbələ" klublarının sabiq futbolçusu Nika Kvekveskiri karyerasını başa vurub.
Sportnet.az xəbər verir ki, 33 yaşlı sabiq yarımmüdafiəçi fəaliyyətini Gürcüstan milli komandasın məşqçilər heyətində davam etdirəcək.
O, qərarını mətbuat konfransında açıqlayıb.
Qeyd edək ki, Nika Kvekveskiri Gürcüstan millisində 62 oyun keçirib. Məhz onun penaltini dəqiq yerinə yetirməsi sayəsində qonşu ölkə yığması pley-off matçında Yunanıstana qalib gələrək, 2024-cü il Avropa çempionatına vəsiqə qazanıb.
Kvekveskiri 2015/2016 mövsümündə "İnter"də, 2016/2017 mövsümündə "Qəbələ"də çıxış edib. O, məhz "İnter"in formasını geyindiyi vaxt Gürcüstan millisinə dəvət alıb və 2015-ci il oktyabrın 8-də Cəbəllütariqə qarşı görüşdə debüt edib. Kvekveskirinin yığmada son matçı isə bu il martın 20-də səfərdə Ermənistana qarşı olub.
