Bu gün Azərbaycan Premyer Liqasında XIII tura start veriləcək.
Sportnet.az xəbər verir ki, ilk oyun günündə 2 görüş keçiriləcək.
Yevlax şəhər stadionunda "Kəpəz" "Zirə"ni qəbul edəcək.
Gəncə komandası ötən tur elə bu arenada "Karvan-Yevlax"a 2:1 hesabı ilə qalib gələrək, 6 xalla sonuncu pillədən 10-cu mövqeyədək irəliləyib. Bakının qəsəbə təmsilçisi isə "Qəbələ"ni minimal hesabla yenərək, 23 xalla 3-cü yerə qalxıb.
İki komanda indiyədək 25 dəfə üz-üzə gəlib. Bunların cəmi 3-də "Kəpəz" qalib gəlibsə, 14-də "Zirə" sevinib. Daha 8 matç heç-heçə ilə yekunlaşıb. Topların nisbətində də paytaxt klubunun ciddi üstünlüyü var - 41:17. “Zirə” son 7 oyunda qalib gəlib. “Kəpəz” isə son 6 matçda qol belə, vura bilməyib.
Saat 14:00-da başlanacaq görüşü baş hakim Rəşad Əhmədov idarə edəcək.
Günün digər oyununda isə "Turan Tovuz" "Neftçi"ni sınağa çəkəcək. Hər iki komanda ötən turu qələbəsiz başa vurub. Tovuzlular səfərdə "Araz-Naxçıvan"la 1:1 hesablı heç-heçə edibsə, bakılılar evdə debütant "İmişli"yə uduzub - 2:3. Bu məğlubiyyətdən sonra Samir Abasov istefaya göndərilib. Yeni baş məşqçi axtarışında olan komandanı səfər matçına Sənan Qurbanov çıxaracaq.
Hazırda "Turan Tovuz" 23 xalla 2-ci, "Neftçi" 15 xalla 8-cidir.
Komandalar indiyədək 13 dəfə üz-üzə gəliblər. 2 görüşdə "Turan Tovuz", 6 matçda "Neftçi" qələbə qazanıb, 5 oyun heç-heçə ilə yekunlaşıb. Topların nisbətində də paytaxt komandası öndədir - 17:11. Son 5 qarşılaşmada meydan sahibi olan komanda qalib gələ bilməyib. “Turan Tovuz”un son üç ev oyununda hər iki komanda qol vurub.
Saat 18:30-da başlanacaq görüşü baş hakim Fərid Hacıyev idarə edəcək.
Azərbaycan Premyer Liqası, XIII tur
28 noyabr (cümə)
14:00. “Kəpəz” – “Zirə”
Hakimlər: Rəşad Əhmədov, Akif Əmirəli, Teymur Teymurov, İslam Məmmədov
VAR: Rəvan Həmzəzadə
AVAR: Cəmil Quliyev
Hakim-inspektor: Şahin Cəfərov
AFFA nümayəndəsi: Eldəniz Musayev
Yevlax şəhər stadionu
18:30. “Turan Tovuz” – “Neftçi”
Hakimlər: Fərid Hacıyev, Rəhman İmami, Müslüm Əliyev, Vüqar Həsənli
VAR: Nicat İsmayıllı
AVAR: Rahil Ramazanov
Hakim-inspektor: Babək Quliyev
AFFA nümayəndəsi: Məmmədəli Məmmədov
Tovuz şəhər stadionu
Qeyd edək ki, turun qalan oyunları 29-30 noyabrda keçiriləcək.
