Bu gün Azərbaycan Premyer Liqasında XXV turun daha 2 oyunu keçiriləcək.
Sportnet.az-ın məlumatına görə, ilk matç Yevlax şəhər stadionunda "Kəpəz" və "Qarabağ" arasında olacaq.
Saat 15:00-da başlanacaq oyunu baş hakim Əli Əliyev idarə edəcək.
Hazırda Gəncə təmsilçisi 24 oyundan 18 xalla 10-cu, Ağdam klubu isə 23 oyundan 52 xalla 2-ci yerdə gedir.
İki komandanın əvvəlki 63 qarşılaşmasından 15-də "Kəpəz", 36-da "Qarabağ" qələbə qazanıbsa, 12-si heç-heçə ilə yekunlaşıb. Topların nisbətində isə ağdamlıların üstünlüyü belədir - 103:63.
“Qarabağ” "Kəpəz"ə qarşı axırıncı 18 səfər matçında uduzmayıb. Gəncə komandası son 2 ev oyununda qol vurmayıb.
Bu kollektivlərin yanvarın 24-də "Azersun Arena"da baş tutmuş son duelində "Kəpəz" 2:0 hesabı ilə qalib gələrək, "Qarabağ"a ağır zərbə vurub.
Günün digər görüşündə "Neftçi" debütant "İmişli"ni qəbul edəcək. "Palms Sports Arena"da saat 19:15-də başlanacaq qarşılaşmaya yeni FIFA referisi Tural Qurbanov təyinat alıb.
Hazırda "Neftçi" 23 oyundan 34 xalla 6-cı, "İmişli" 24 oyundan 22 xalla 9-cudur. Debütant bu mövsüm sonuncu qələbəsini noyabrın 23-də elə bu arenada paytaxt təmsilçisi üzərində qazanıb - 3:2. Həmin qalibiyyətdən sonra "ağ-qaralar"ın baş məşqçisi Samir Abasov istefaya göndərilib.
Komandaların ilk dövrədəki görüşündə də "Neftçi" qalib ola bilməyib.
Azərbaycan Premyer Liqası, XXV tur
15:00. “Kəpəz” – “Qarabağ”
Hakimlər: Əli Əliyev, Elşad Abdullayev, Tərlan Talıbzadə, Emin Əliyev
VAR: Rauf Cabarov
AVAR: Namiq Hüseynov
Hakim-inspektor: Feyzulla Feyzullayev
AFFA nümayəndəsi: Elman Musayev
Yevlax şəhər stadionu
19:15. “Neftçi” - “İmişli”
Hakimlər: Tural Qurbanov, Asiman Əzizli, Cəmil Quliyev, Elvin Bayramov
VAR: İnqilab Məmmədov
AVAR: Kamran Bayramov
Hakim-inspektor: Rəhim Həsənov
AFFA nümayəndəsi: Elgiz Abbasov
“Palms Sports Arena”
Qeyd edək ki, XXV turun əvvəlki oyunlarında "Araz-Naxçıvan" səfərdə "Şamaxı"nı, "Zirə" "Karvan-Yevlax"ı eyni hesabla yenib - 1:0. "Sabah" isə evdə "Sumqayıt"a qalib gəlib - 3:1. Tura martın 21-də keçiriləcək "Turan Tovuz" - "Qəbələ" matçı ilə yekun vurulacaq.
