Bu gün Azərbaycan Premyer Liqasında XXVII turun son 2 oyunu keçiriləcək.
Sportnet.az-ın məlumatına görə, qarşılaşmalar bölgələrdə təşkil olunacaq.
"Qəbələ" debütant "İmişli" ilə münasibətlərinə aydınlıq gətirəcək. Qəbələ şəhər stadionunda saat 15:30-da başlanacaq görüşü baş hakim Rəşad Əhmədov idarə edəcək.
Hazırda "Qəbələ" 26 oyundan 19 xalla 11-ci, "İmişli" 23 xalla 9-cu yerdə gedir. Meydan sahibləri qələbə qazansalar, 10-cu pilləyə yüksələrək, qonaqlarla xal fərqini minimuma endirəcəklər.
İki komanda yalnız bu mövsüm üz-üzə gəlib. Əvvəlki iki oyundan birincisində 2:2 hesablı heç-heçə qeydə alındığı halda, növbətisində "Qəbələ" qələbə qazanıb - 3:2. Başqa sözlə, “qırmızı-qaralar” əvvəlki görüşlərdə uduzmayıb. Hər iki komanda bu matçlarda ən azı 2 qol vurub. Topların nisbətində "Qəbələ"nin üstünlüyü belədir - 5:4.
Son oyun isə "Turan Tovuz" və "Sumqayıt" arasında gerçəkləşəcək. Matç bir müddətlik aradan sonra yenə Tovuz şəhər stadionunda keçiriləcək. Saat 15:30-da başlanacaq görüşü baş hakim Kamranbəy Rəhimov idarə edəcək.
Meydan sahibləri qələbə qazansalar, xallarını 52-yə çatdıraraq, 3-cü pillədə möhkəmlənərək, avrokuboklara doğru önəmli addım atacaqlar. 32 xalla 7-ci yerdə gedən "Sumqayıt"ın isə heç bir ciddi iddiası, demək olar ki, qalmayıb.
Tərəflər arasındakı əvvəlki 14 oyunun 6-dan "Turan Tovuz", 4-dən "Sumqayıt" qələbə ilə ayrılıb, daha 4 matçda heç-heçə qeydə alınıb. Topların nisbətində isə Tovuz komandasının üstünlüyü belədir - 19:16.
Şəxsi görüşlərin son 7-də “Turan Tovuz” qol vurub. “Sumqayıt” axırıncı 3 oyunda xal qazanmayıb.
Azərbaycan Premyer Liqası, XXVII tur
12 aprel (bazar)
15:30. “Qəbələ” – “İmişli”
Hakimlər: Rəşad Əhmədov, Eyyub İbrahimov, Tərlan Talıbzadə, İslam Məmmədov
VAR: Əli Əliyev
AVAR: Zöhrab Abbasov
Hakim-inspektor: Əmrah İbrahimov
AFFA nümayəndəsi: Kifayət Mustafayeva
Qəbələ şəhər stadionu
18:00. “Turan Tovuz” – “Sumqayıt”
Hakimlər: Kamranbəy Rəhimov, Akif Əmirəli, Kərim Zeynalov, Kamran Əliyev
VAR: Fərid Hacıyev
AVAR: Rəhman İmami
Hakim-inspektor: Babək Quliyev
AFFA nümayəndəsi: Nəriman Axundov
Tovuz şəhər stadionu
Qeyd edək ki, XXVII turun əvvəlki oyunlarında "Karvan-Yevlax" evdə "Kəpəz"i 4:1, "Neftçi" "Araz-Naxçıvan"ı 2:1 hesabı ilə yenib, "Şamaxı" "Qarabağ"la 0:0, "Sabah" "Zirə" ilə 2:2 hesablı heç-heçə edib.
