Azərbaycan Kuboku uğrunda 1/8 final mərhələsinin ilk oyunlarına yekun vurulub. Sportnet.az-ın məlumatına görə, eyni gündə keçirilən ilk matçlar gözlənilməz nəticələrsiz ötüşmədi. İddialı klubıların son pillələrin sahiblərindən "autsayder silləsi” aldığını deyə bilərik.
Sözsüz ki, ən böyük sensasiya "Bayıl Arena”da qeydə alındı. Premyer Liqada son pillənin sahibi olan "Rəvan” mükafatalara oynayan "İnter” üzərində əzmkar qələbə qazana bildi. Düzdür, "bankirlər” üçün 1:2 hesabı heç də pis nəticə deyil və səfərdə qol vurmağı işinə yarayacaq. Ancaq "Rəvan”a mərhələ keçmək üçün istənilən heç-heçənin sərf etdiyini də unutmaq olmaz.
Digər autsayder "Xəzər Lənkəran” də avrokuboklara iddialı rəqibini minimal fərqlə yenə bildi. Düzdür, "İnter”dən fərqli "Neftçi” səfərdə 2 qol vura bilib. Yəni "ağ-qaralar”a yarımfinala çıxmaq üçün təkcə 1:0, 2:1 hesablı qələbə də sərfəlidir. Əsgər Abdullayev "Neftçi”nin baş məşqçisi postunda debütünü "Fırtınalar meydanı”nda tarixi qələbə (2:0) ilə qeyd etmişdisə, bu dəfə Lənkərandan məyus qayıtdı. "Xəzər Lənkəran” "Neftçi” ilə səfər matçlarında heç-heçə edə bildiyini nəzərə alsaq, cütün qalibi olmaq şansı heç də az deyil. Hər halda, cənublular cari çempionatda "Bakcell Arena”ya ilk səfərində 1:1 hesablı heç-heçə etmişdisə (özü də bərabərlik qolunu azlıqda vurmuş), ikinci oyununda 1 xal üçün 3 dəqiqə çatmamışdı – 0:1.
Finalda görüşməyə ən real namizədlər olan "Qarabağ” ilə "Qəbələ” bu yolda böyük addım atdılar. Ağdam klubu nəhayət ki, cari mövsümdə "Sumqayıt”ı yenə bildi. "Gənclik şəhəri” təmsilçisi elə hazırkı baş məşqçisi Samir Abasovun vaxtında "Qarabağ”a qalib gəlməyi (1:0) bacarsa da, bu dəfə mərhələ keçmək üçün böyükhesablı qələbə lazımdır. Bu isə real görünmür.
"Zirə” evdə uduzduğundan, işini daha çətindir. Çünki Qəbələ səfərindən 2 top fərqli qələbə ilə qayıtmaq heç də asan məsələ deyil. Ona görə də bu iki cütdə qalibin böyük ölçüdə həll olunduğunu indidən demək olar.
Azərbaycan kuboku, 1/4 final mərhələsi
İlk oyunlar
2 mart
"Rəvan” – "İnter” – 2:1
"Qarabağ” – "Sumqayıt” – 2:0
"Xəzər Lənkəran” – "Neftçi” – 3:2
"Zirə” – "Qəbələ” – 1:2
Qeyd edək ki, cavab matçları martın 9-da keçiriləcək.
Mehman Süleymanov
