Rusiyanın "Zenit" klubunun baş məşqçisi Andre Villaş-Boaş mövsüm sonunda komandadan ayrılacaq. Sportnet.az-ın məlumatına görə, bu barədə 38 yaşlı mütəxəssisin özü açıqlama verib.
Bir müddət əvvəl bu barədə danışan Villaş-Boaş qərarının dəyişmədiyini söyləyib: "Mövsüm sonunda komandadan ayrılacam. Burada işləmək çox yaxşı idi. Rusiyanı həmişə öz evim kimi hesab edəcəm. "Zenit"in mükəmməl rəhbərliyi var. Mənə böyük dəstək olublar. Bu səbəbdən kluba yalnız təşəkkür edə bilərəm".
Portuqaliyalı mütəxəssis "Zenit"dən ayrıldıqdan sonra vətəninə qayıdacağını və bir il istirahət edəcəyini bildirib.
Qeyd edək ki, o, 2014-cü ilin martından "Zenit"də çalışır.
