Azərbaycan və Ukraynanın futbol üzrə milli komandaları arasında yoldaşlıq oyununun keçirilmə ehtimalı yenidən gündəmə gəlib. Sportnet.az xəbər verir ki, bu barədə Ukrayna Futbol Federasiyasının vitse-prezidenti Vladimir Laşkul millinin Avropa çempionatına hazırlıqları barədə danışarkən məlumat verib.
Onun sözlərinə görə, Ukrayna çempionatının mayın 15-də başa çatacağı nəzərə alınaraq, 19 - 22 mayda və ya 19 - 27 mayda İtaliyada komandanın bərpa və sağlamlıq toplanışı keçiriləcək. Mayın 27-dən isə iyunun 7-dək yığma İsveçrədə təlim-məşq toplanışına başlayacaq. Həmin bu vaxt kəsiyində komanda mayın 29-da Rumıniya, iyunun 3-də Albaniya və 3 gündən sonra Moldova ilə qarşılaşmalıdır. Sonuncu ilə danışıqlar FİFA agentinin oyunun təşkili üçün 140 min avro istəməsi səbəbindən dalana dirənib. Azərbaycan millisi ilə oyun üçün isə bu rəqəmin 80 min avro olduğu bildirilir.
Qeyd edək ki, daha öncə Ukrayna yığması Azərbaycanla görüşdən imtina edərək, Rumıniya ilə qarşılaşmağa qərar verib. Azərbaycan millisinin Avstriyada mayın 23-dən iyunun 4-dək hazırlıq keçəcək. Həmin müddətdə mayın 29-da Makedoniya, iyunun 2-də isə Kanada ilə yoldaşlıq görüşünün keçiriləcəyi dəqiqləşib. Toplanış vaxtı uzadılmasa, Ukrayna ilə iyunun 6-da yoxlama oyununun təşkili mümkün olmayacaq.
