Bu gün 17 yaşadək futbolçulardan ibarət Azərbaycan yığması Avropa çempionatının qrup mərhələsində növbəti oyununu keçirib. Sportnet.az-ın məlumatına görə, Təbriz Həsənovun rəhbərlik etdiyi komandanın rəqibi Belçika yığması olub.
Matçın ilk hissəsində komandalar fərqlənməyə çalışsalar da, onların bu istəkləri nəticə verməyib. İlk yarı qolsuz bərabərliklə başa çatıb. İkinci hissədə komandalar daha çox aktivlik göstərib. Matçın 59-cu dəqiqəsində rəqibin hücumu zamanı qapıçı Məmməd Hüseynov Belçikada forma geyinən Jules Vanhaeke ilə toqquşub. Nəticədə azərbaycanlı qolkiper yerdə qalıb. Komanda həkimlərinin və Təcilli Tibbi Yardım əməkdaşlarının köməyi nəticəsində Hüseynov özünə gəlib. Qapıçı Təcili Tibbi Yardım maşını ilə xəstəxanaya aparılıb. Hüseynovu Kamran İbrahimov əvəzləyib.
Bundan sonra Belçika yığması müdafiənin səhvindən istifadə edərək hesabı açıb. Adrien Bonqiovanni adını tabloya yazdırıb - 1:0. Cəmi 6 dəqiqə sonra - matçın 78-ci dəqiqəsində Murad Mahmudov hesaba tarazlıq gətirib. Bundan sonra oyun daha da gərginləşib. Oyunun artırma dəqiqələrində Lois Opendə qapı dirəyini hədəf alıb.
Qrupun digər oyununda Portuqaliya yığması Şotlandiyanı qəbul edib. Görüş portuqalların 2:0 hesablı qələbəsi ilə yekunlaşıb.
Nəticədə Portuqaliya yığması 6 xalla birinci pillədə möhkəmlənib. Belçika 4 xalla ikinci, Azərbaycan isə 1 xalla 3-cü pillədə qərarlaşıb. Aktivində xal olmayan Şotlandiya yığması isə sonuncudur.
8 may
A qrupu
15:30. Portuqaliya - Şotlandiya - 2:0
Qollar: Quina, 37. Joze Qomeş, 55
Baş hakim: Qunnar Jarl Consson (İslandiya)
"Dalğa Arena"
19:00. Azərbaycan - Belçika - 1:1
Qollar: Murad Mahmudov, 77 - Adrien Boncovanni, 73
Baş hakim: Petr Ardeleanu (Çexiya)
"Bakcell Arena"
Xallar: Portuqaliya - 6. Belçika - 3. Şotlandiya - 0. Azərbaycan - 0.
B qrupu
14:00. Ukrayna - Avstriya - 0:2
Qollar: Romano Şmid, 7. Valentino Müller, 21
Baş hakim: Sveyn-Erik Erdvartsen (Norveç)
"Bakcell Arena"
19:00. Almaniya - Bosniya və Herseqovina - 3:1
Qollar: Atakan Akkaynak, 17-pen, Yari Otto, 66, 72 - Tom Bak, 2-öz qapısına
Baş hakim: Peter Kraloviç (Slovakiya)
"Dalğa Arena"
Xallar: Avstriya - 6. Almaniya - 1. Ukrayna - 1. Bosniya və Herseqovina - 0.
