Azərbaycanı Çempionlar Liqasında təmsil edəcək "Qarabağ"ın bütün potensial rəqibləri müəyyənləşib. Sportnet.az-ın məlumatına görə, turnirdə birbaşa 2-ci təsnifat mərhələsindən qatılacaq 29 komandanın hamısı artıq məlumdur.
Sonuncu Moldovanın "Şerif” klubu olub. "Qəbələ"nin sabiq hücumçusu Daniel Sobitiçin heyətində yer aldığı Tiraspol təmsilçisinin reytinqi yüksək olduğuna görə "Qarabağ” kimi səpələnmişlər sırasında yer alıb. Bununla da Azərbaycan və Moldova çempionları rəqib olmayacaqlar. Hərçənd, Moldovanən aşağı reytinqli komandası çempion olsaydı, səpələnməmişlər sırasına düşəcəyindən, "Qarabağ"ın potensial rəqibinə çevriləcəkdi. Təmsilçimizin potensial rəqibləri arasında 12 klub və 4 cütlük var. Azərbaycan və Ermənistan çempionları görüşə bilməzlər.
İlk təsnifat mərhələsinin sonuncu iştirakçısı isə San-Marinonun "Tre-Penne” klubu olub. O, səpələnməmişlər arasında yer alıb.
Beləliklə, iyunun 20-də İsveçrənin Nyon şəhərində keçiriləcək Çempionlar Liqasının ilk iki təsnifat mərhələsinin püşkatması üçün 39 komandanın hamısı məlumdur. İştirakçı ölkələr arasında debütant Kosovodur. Latviyanın da mübarizəyə daha tez başlamağa məcbur olması diqqət çəkir.
Çempionlar Liqası
1-ci təsnifat mərhələsi
Səpələnmişlər: TNS (Uels), "Flora” (Estoniya), "Valletta” (Malta), "Santa Koloma” (Andorra), "Torshavn” (Farer adaları)
Səpələnməmişlər: "Linkoln” (Cəbəllütariq), "Alaskert” (Ermənistan), "Liepaya” (Latviya), "Feronikeli” (Kosovo), "Tre-Penne” (San-Marino)
2-ci təsnifat mərhələsi
Səpələnmişlər: "Qarabağ” (Azərbaycan),"Zalsburq” (Avstriya), "Seltik” (Şotlandiya), APOEL (Kipr), BATE (Belarus), "Legiya” (Polşa), "Dinamo” (Zaqreb, Xorvatiya), "Ludoqorets” (Bolqarıstan),"Kopenhagen” (Danimarka),"Rusenborq” (Norveç), "Astana” (Qazaxıstan), "Skenderbeu” (Albaniya), "Srvena Zvezda” (Serbiya), "Dinamo” (Tiflis, Gürcüstan), "Hafnarfyorfur” (İslandiya), "Trençin” (Slovakiya), "Şerif” (Moldova)
Səpələnməmişlər: "Olimpiya” (Sloveniya), "Düdelanj” (Lüksemburq), "Ferensvaroş” (Macarıstan), "Vardar” (Makedoniya), "Dandalk” (İrlanaiya), SJK (Finlandiya), , "Norçepinq” (İsveç), "Kruzaders” (Şimali İrlandiya), "Zrinski” (Bosniya və Herseqovina), "Mladost” (Monteneqro), "Jalgiris” (Litva), "Hapoel” (Beyer-Şeva, İsrail), 1-ci təsnifat mərhələsinin 5 qalibi.
