"Neftçi” əsas qapıçısı Aqil Məmmədovla yollarını ayırandan sonra yeni qolkiper axtarışındadır. Sportnet.az-ın məlumatına görə, Avropa Liqasında ölkəmizi təmsil edəcək komandanın təcrübəli əlcək sahibinə ehtiyacı var. Baş məşqçi Vəli Qasımovun hazırda sərəncamında olan qapıçılar gənclər Maksim Vaylo ilə Kamran İbrahimovdur.
Hazırkı vəziyyətdə ən real variantlardan biri Kamran Ağayevin transferi sayılır. Uzun illərdir milli komandamızın "1 nömrə”si olan Ağayevin "ağ-qaralar”a yolu açılıb. Hər halda, "İnter”dən gedəndən sonra sərbəst olan 30 yaşlı futbolçu özünə klub axtarır. Məmmədov olan vaxtda isə Ağayevin heyətə cəlb olunması real sayılmırdı. Ancaq indi vəziyyət tam fərqlidir.
Ağayevin keçidinin reallaşmasında Dmitri Kramarenko amili böyük rol oynaya bilər. Məsələ ondadır ki, Kamran indiki səviyyəsində böyük əməyi olan təcrübəli həmkarı ilə uzun illər eyni klubun şərəfini qoruyub. Bu, əvvəl "Xəzər Lənkəran" idi ki, onda Ağayev əsas qapıçısı, Kramarenko onun əvəzləyicisi idi. Kamran "Qəbələ"də çıxış edəndə isə
Kramarenko artıq onun məşqçisi idi. Qapıçılarla işləyən məşqçi Ağayevin transferində təşəbbüskarlardan biri oldu. 42 yaşlı mütəxəssis indi də bu təşəbbüslə çıxış edə bilər. Üstəlik, "Neftçi"nin Ağayev kimi təcrübəli qapıçıya böyük ehtiyacı var.
Ağayev heç vaxt çıxış etmədiyi "Neftçi”nin uzun müddət prinsipial rəqibi olub. Bu, "Xəzər Lənkəran"da oynadığı vaxtda 7 ilə yaxın müddəti əhatə edib. Özü də Ağayev "ağ-yaşıllar"da "Neftçi"yə qarşı çıxış etdiyi matçlarda uzun müddət məğlubiyyət acısı dadmayıb.
"Neftçi” üçün digər variant yaxşı tanıdığı Emil Balayevi qaytarmaq ola bilər. "Ağ-qaralar” yetirməsi olduğu Balayevin "Ayntraxt"a keçidinə imkan yaratsa da, gənc qapıçısı orada heyətə düşə bilməyib. Bu üzdən Balayevin həm təcrübə, həm də oyun praktikası sarıdan korluq çəkməyi öz sözünü deyir.
Xatirladaq ki, Kamran Ağayevlə "İnter”də ötən mövsüm komanda yoldaşı olduğu Vüqar Nadirovun "Neftçi”yə keçəcəyi ilə bağlı hələ bir müddət öncə informasiyalar yayılmışdı.
