"Yeni tranferlərimizə böyük inamımız var. Onlardan əksəri legionerlər, 1-i isə tanıdığımız yerli futbolçudur". Bu fikirləri Sportnet.az-a açıqlamasında "Neftçi"nin baş məşqçisi Vəli Qasımov deyib. Avropa Liqasında ölkəmizi təmsil edəcək komanda artıq heyətinə 5 yeni futbolçu dəvət edib. Bunlardan "Sumqayıt"dan gələn Murad Ağayev millimizdə oynayıb, digərləri isə ölkəmizdə debüt edəcək legionerlərdir: "Mərkəz müdafiəçisi Vançe Şikov uzun müdddətdir Makedoniya yığmasında oynayır, kapitan sarğısını da daşıyıb. Çox təcrübəli futbolçudur. Məncə, ən yaxşı transferimiz elə o, olacaq. Dario Melnyak xorvatiyalı sol cinah müdafiəçisidir. Belçikanın "Lokeren" klubundan icarəyə götürmüşük. Dario gənc futbolçudur, son klubundan az oynadığına bizə gəlib. Edson Kastilyo isə Veneseulanın U-20 və U-17 yığmalarında oynayıb. Oyun qurucusu mövqeyində çıxış edən futbolçu çox yaxşı texnikalıdır".
"Neftçi"nin son transferi də xorvatiyalı legionerdir. Aqil Məmmədovun gedişindən sonra yeni qapıçı axtaran "ağ-qaralar" Krşevan Santinini transfer edib. Qasımov bu qapıçın də təcrübəli legioner kimi komandaya faydalı olacağını hesab edir. Onun sözlıərinə görə, Aylton Silva ilə müqavilənin uzadılması ilə bağlı danışıqlar gedir. Ancaq brazilyalı müdafiəçi ötən mövsüm "Mladots"la cacab matçında aldığı cəzaya görə ilk mərhələdə iştirak edə bilməz.
Qeyd edək ki, UEFA-ya Avropa Liqasının ilk təsnifat mərhələsinin oyunları üçün iştirak ərizəsinə göndərən "Neftçi" Maltanın "Baltsan" klubu ilə ilk matça 24 saat qalmışadək daha bir bir futbolçu sifariş etmək hüququna malikdir. Bu, yeni qapıçı olacaq. "Neftçi" maltalılarla ilk matçını iyunun 30-sa səfərdə keçirəcək.
