"Qəbələ"nin Antalyadakı təlim-məşq toplanışında keçirəcəyi yoxlama oyunlarında daha bir rəqibi müəyyənləşib. Klubun meneecri Səbuhi Səfiyarlı Sportnet.az-a verdiyi məlumata görə, Qazaxıstanın "Ordabası" klubu ilə qarşılaşmaları dəqiqləşib: "Bu oyun yanvarın 19-da olacaq. Antalyada daha bir oyunumuz yanvarın 23-nə nəzərdə tutulub. Ancaq ona rəqibi hələ dəqiqləşdirməmişik. Son yoxlama matçlarımızdan olacağından münasib rəqiblə görüşmək istəyirik".
"Qırmızı-qaralar"ın Türkiyədəki hazırlıq prosesində 5 sınaq matçı keçirməsi nəzərdə tutulub. Daha öncə dəqiqləşənlər yanvarın 13-ü "Partizani" (Albaniya), 18-i "Qaz Metan" (Rumıniya), 24-ü "Şkendiya" (Makedoniya) ilə görüşlərdir. Səfiyarlı yanvarın 18-19-u və 23-24-də ardıcıl oyunların keçirilməsi planda olduğu söyləyib. Sadəcə, bu ardıcıl günlərdəki oyunların hərəsində bir heyət oynayacaq.
Qeyd edək ki, "Ordabası" qış fasiləsinə 5-ci pillədə yollanıb.
Mehman SÜLEYMANOV
