Türkiyənin Antalya bölgəsində hazırlığını davam etdirən "Neftçi” komandası daha bir futbolçu ilə güclənib. Sportnet.az-ın klubun rəsmi saytına istinadən verdiyi məlumata görə, ukraynalı müdafiəçi Kirill Petrovla 1,5 illik müqavilə bağlanılıb.
Kiyev "Dinamo”sunun yetirməsi olan 26 yaşlı oyunçu sonradan "Krivbas” və "Arsenal” klublarının formasını geyinib. Polşa "Korona”sında da legioner həyatı yaşamış Petrov Qazaxıstanın "Ordabaşı” klubunda da çıxış edib. Futbolçunun sonuncu klubu isə Donetsk "Olimpik”i olub. Ukrayna U-19 və U-21 yığma komandalarının da formasını geyinmiş Petrov "Neftçi”də 28 nömrəli formanı geyinəcək.
