"Qarabağ"ın futbolçusu Coşqun Diniyevin Sportnet.az-a müsahibəsi
- AZAL üzərində qələbə qazanmaqda çətinlik çəkəcəyinizi gözləyirdiniz?
- Düzünü desəm, gözləyirdik. Çünki artıq neçənci ildir ki, qış fasiləsindən sonra oynadığımız ilk 2-3 oyunda çətinliklə qalib gəlirik və ya xallar itiririk. Fasilədən sonra bütün komandalar qələbə ilə başlamaq istəyirlər. AZAL-ı iki gün ərzində yaxşı analiz etdik və səfərə də elə gəldik. Düzünü desəm, AZAL-ı necə məğlub edəcəyimizi götür-qoy etdik. Qalib gəlib üç xalı evə aparırıq.
- AZAL-ın meydançası ilə bağlı hər hansı çətinliklə üzləşdiniz?
- Stadionla heç bir əlaqəsi yoxdur. Fasilədə bütün komandalar yaxşı hazırlıq keçərək, qələbə ilə başlamaq istəyir. Optimal formada olmursan və ilk oyunlar çətin alınır.
- "Neftçi” ilə oyunda baş hakimin səhv qərarlar verməsi sizdə təzyiq yaradırdı?
- Xeyr, belə bir şey yoxdur. Baş məşqçimiz Qurban Qurbanov bizə bildirmişdi ki, hərə öz işi ilə məşğuldur. Hakim nə qərar veribsə, onunla razılaşmalıyıq. Hakim də səhv edə bilir.
- İki qolun hər ikisini uzaq zərbələrdən vurdunuz. Dani Kintana və Riçard Almeydanın yoxluğunda yalnız belə qol vuracağınızı yəqin, özünüz də bilirdiniz. Qurban Qurbanov tapşırığı belə vermişdi?
- Xeyr, Qurban müəllim belə tapşırıq verməmişdi. Özümüz meydanda danışırdıq. Bir-birimizə deyirdik ki, mümkünsüz kimi bir şeydir, rəqib bütün komanda ilə arxada idi. Cinalardan nəsə edə biləcəyimiz çətin idi. Uzaq məsafələrdən isə zərbələr vurmaq imkanlarımız var idi. Təkcə elə bundan istifadə edə bilərdik ki, bundan yararlandıq.
- AZAL-ın futbolçusu Sadio Tounkaranın qırmızı vərəqə epizodu ilə bağlı fikrin necədir?
- Baş hakim qırmızı vərəqə verdi, bununla bağlı nəsə demək artıqdır. Həmin epizodu gördüm. Fikrimcə, İbrahim Şehiçə qarşı Sadio Tounkara qaydanı pozmuşdu.
