"Sumqayıt”ın qapıçısı Fərhad Vəliyevin Sportnet.az-a müsahibəsi
- "Kəpəz"ə 3:1 hesabı ilə qalib gəldiyiniz matç haqda nə deyərdin?
- Əlbəttə, bizə "Kəpəz”lə oyunda 3 xal hava-su kimi lazım idi. Çünki bu oyundan qabaq evdə iki xal itirmişdik və "Zirə” bizi iki xal üstələyib 4-cü pilləyə yerləşmişdi. Bu oyunda 3 xal götürdük. Birinci hissə bizim üstünlüyümüz şəraitində keçdi. Ancaq ikinci hissədə "Kəpəz” sürətini artırdı, qol epizodları yaratdı.
- "Kəpəz”dəki durum heç də yaxşı deyildi. Hətta Şahin Diniyevin istefa verəcəyi belə deyilirdi. Bunlar sizin üçün üstünlük idi?
- Bizim məlumatımız var idi. "Kəpəz” də neçə oyundur ki, məğlubiyyətlə üzləşirdi. Buna baxmayaraq biz hər oyuna ciddi hazırlaşırıq. Onsuz da bilirdik ki, gərgin oyun olacaq. Gözəl qələbə ilə azarkeşlərimizi sevindirə bildik.
- Qışdan sonra 3 oyuna 5 xal qazanmısınız. Avropaya özünüzü yaxın hiss edirsiniz?
- Düzdür, "Sumqayıt” indiyə qədər bu yerlərə gəlib çıxmamışdı. Ancaq avrokuboklar barədə fikirləşmək hələ tezdir. Çalışırıq ki, maksimum nəticə göstərək. Güclü komandalardan ən azı 1 xal götürüb, özümüzə bərabər komandalara qalib gələk və ən yüksək yerləri tutaq.
- Azər Salahlının sənə topu ötürdüyü epizodda yadından çıxdı deyə, topu əlinə götürdün?
- Mən gördüyüm epizodu danışım. Dario Federiko və Azər Salahlı arasında mübarizə gedirdi. Top elə ikisinin ayağından gəldi deyə, götürdüm. Ancaq Azər deyir ki, mən topu çölə çıxarmaq istəyirdim, top sənə gəldi.
- Dario Frederikonun ikinci qola yaxın olduğu epizodda top dirəyə dəydi və həmin an Kamran Abdullazadəyə sərt şəkildə nəsə bildirirdin. Nə baş vermişdi orada?
- Təcrübəmdən irəli gələrək ona fikirlərimi bildirirəm, sakit oynamağını istəyirəm. Ayağındakı topu boş-boşuna rəqibə verməsin deyirdim, başqa heç nə.
- Qarşıdakı turda "Neftçi” ilə qarşılaşacaqsınız. "Sumqayıt” uğurlu çıxışını davam etdirə biləcək?
- "Neftçi”yə qarşı səfərdə bizi çətin oyun gözləyir. Birinci və ikinci dövrədə onlara qarşı oynamışıq. Hətta "Neftçi”yə səfərdə qalib də gəlmişik.
- Birdən-birə 9 transfer edən rəqib komanda haqda fikrin necədir?
- Əlbəttə ki, "Neftçi” tarixi olan komandadır. Bu cür komandanın Çempionlar Liqasında, avrokuboklarda oynamasını istəyərdim. Yeni transferləri gəlib. Məncə, "Neftçi”də hələ yenilər bir-birinə tam uyğunlaşmayıb. Bunun üçün vaxt lazımdır. Hər şeyə rəğmən bizi gərgin oyun gözləyir.
- "Qarabağ” və "Qəbələ” arasında gedən çempionluq mübarizəsindən hansı komandanın qalib ayrılacağını düşünürsən?
- Həm "Qarabağ”, həm də "Qəbələ” çempion ola bilər. Son tura kimi də qızğın mübarizə gedəcək. Reynaldo "Qarabağ”dan getdi, bu da təsirsiz deyil. Üstəlik, Dani Kintana da zədələndi. Amma Qurban Qurbanov komandada elə sistem qurub ki, əvəzedilməz oyunçu yoxdur. Məncə, gələn mövsüm üçün də komandaya yaxşı transferlər olunacaq.
