Azərbaycan I divizionunda mübarizə aparan "Turan Tovuz" klubunun bəzi futbolçuları qidadan zəhərlənib.
Sportnet.az-ın klubun rəsmi "Facebook" səhifəsinə istinadən verdiyi məlumata görə, ötən gün baş vermiş hadisə nəticəsində onlar Tovuz Rayon Təcili Tibbi Yardım Şöbəsinə qəbul olunublar.
Müalicələri başa çatan oyunçulardan bəziləri evə buraxılsalar da, bir neçəsi hələ də xəstəxananın İnfeksion Xəstəliklər Şöbəsindədir.
"Turan Tovuz"un futbolçularının martlın 9-da I divizionun XIX turu çərçivəsində "Səbail" klubu ilə səfər matçına qədər tam sağalmaları sual altındadır. Bu səbəbdən görüşün martın 11-ə keçirilməsi üçün Peşəkar Futbol Liqasına vı "Səbail" klubuna müraciət olunub. Lakin təşkilatçı qurumdan oyunun "CBC Sport" vasitəsi ilə canlı yayımlanacağı, bu üzdən başqa vaxta keçirilməsinin mümkünsüz olduğu bildirilib.
Qeyd edək ki, martın 9-da "Bayıl Arena"da keçiriləcək "Səbail" - "Turan Tovuz" oyunu saat 19:00-da başlayacaq.
