"Neftçi" klubu "Zirə" ilə Azərbaycan Premyer Liqasının XXVII tur matçında legioner limitini pozub. Sportnet.az-ın məlumatına görə, bu, 68-ci dəqiqədə edilən əvəzləmə zamanı baş verib.
68-ci dəqiqədə Ruslan Abışov meydanı tərk edib. Əvəzində onun yerinə yerli yox, fransalı Huqo Barqas meydana daxil olub. Baş məşqçi Elxan Abdullayev səhvini 3 dəqiqə sonra anlayıb. O, çilili İqnasio Herreranı meydandan alaraq, yerinə Cavid İmamverdiyevi buraxıb.
Qeyd edək ki, hazırkı qaydalara əsasən, meydanda 6 legioner, 5 yerli oyunçu olmalıdır. İlk əvəzləmə vaxtı isə "Neftçi"dəki legionerlərin sayı 7-yə yüksəlib.
