"Səbail" Futbol Klubunun Müşahidə Şurasının (MŞ) heyətində dəyişiklik baş verib.
Sportnet.az xəbər verir ki, klubun fəaliyyətə başladığı ilk günlərdən MŞ üzvləri olan Təbriz Həsənov və Tural Əsədov rəhbərliyə müraciət edərək işlərinin çoxluğu səbəbindən Müşahidə Şurasının üzvlüyündən xaric olunmalarını xahiş ediblər.
"Səbail" rəhbərliyi müraciətləri müsbət dəyərləndirərək onlara səmərəli fəaliyyətlərinə görə təşəkkürünü bildirib, gələcək işlərində uğurlar arzulayıb.
Təhsil Nazirliyinin Məktəbdənkənar fəaliyyətin təşkili şöbəsinin müdiri Vasif Məmmədov və Bakıda fəaliyyət göstərən "Mançester Yunayted Futbol Məktəbi"nin məşqçisi Cahangir Həsənzadə Müşahidə Şurasının üzvü təyin olunublar.
Qeyd edək ki, "Səbail" klubu 2017-2018 mövsümündən Premyer Liqada çıxış edəcək. Təbriz Həsənov Azərbaycanın 19 yaşadək futbolçulardan ibarət yığma komandasının baş məşqçisi, Tural Əsədov isə aparıcıdır.
