Azərbaycan millisinin futbolçusu Deniz Yılmazın formasını geyindiyi Türkiyənin "Bursaspor” komandasının yeni baş məşqçisi müəyyənləşmək üzrədir. Sportnet.az-ın "Milliyet” nəşrinə istinadən verdiyi məlumata görə, "timsahlar”a fransalı Pol Le Quen rəhbərlik edəcək.
Dünən axşam saatlarında İstanbula gələn 53 yaşlı mütəxəssis klub prezidenti Ali Ayla görüşərək, müqavilənin detallarını müzakirə edib. Fransalı baş məşqçi bugün Bursada yerləşən Özlüce təlim-məşq bazasında təşkil olunacaq tədbirdə rəsmi sözləşməyə imza atacaq.
Müqavilənin müddəti barədə məlumat verilməsə də, yeni məşqçilər korpusunda Mustafa Ər, eləcə də, "Neftçi” və "Xəzər Lənkəran”da fiziki-hazırlıq üzrə məşqçi işləmiş italiyalı Covanni Melkiorrenin də yer alacağı bildirilir.
Qeyd edək ki, "Bursaspor”un baş məşqçisi postuna namizədlər arasında Azərbaycan yığmasının sükanı arxasında olan Robert Prosineçkinin də adı hallanırdı.
Karyerası ərzində Fransanın "Lion” və PSJ komandalarına rəhbərlik edən Pol Le Quenin sonuncu iş yeri Oman millisi olub. (Report)
