"Gürcüstanda olduğum üçün çox şadam. Bu matçda iştirak etmək mənim üçün böyük şərəfdir. Çünki böyük tarixə malik stadionda futbol oynayacağıq. Mən stadionun fotolarını görmüşdüm. Canlı şahidi olduqdan sonra da belə qənaətə gəldim ki, arena burada çıxış etmiş futbolçuların səviyyəsini aydın ifadə edir".
Sportnet.az-ın məlumatına görə, bunu "Qarabağ"ın baş məşqçisi Qurban Qurbanov Gürcüstanın paytaxtı Tbilisidəki Boris Payçadze adına "Dinamo" Arenasında "Samtredia" ilə keçirəcəkləri Çempionlar Liqasının II təsnifat mərhələsinin cavab görüşündən əvvəl mətbuat konfransında deyib. 45 yaşlı mütəxəssis bildirib ki, ilk matçda çoxlu qol vurmalarına baxmayaraq, sabahkı oyuna kifayət qədər ciddi hazırlaşıblar. O, komandasını çox çətin qarşılaşmanın gözlədiyini söyləyib: "Fikrimcə, bu görüş bir həftə əvvəlki ilə müqayisədə daha aqressiv məcrada keçəcək. "Samtredia" özünəməxsus xarakterə malikdir, məğlubiyyəti sevmir. Oyunçuları hər qoldan sonra daha da aqressivləşirlər. Bu səbəbdən, ötən 6 gün ərzində tam ciddi hazırlıq keçmişik. Yaxşı futbol oynamağa və azarkeşləri razı salmağa çalışacağıq. Rəqibə uğurlar arzulayıram".
Q.Qurbanovun fikrimcə, hərdən futbolda layiq olmadığın hesabla da məğlubiyyət baş verir: "Açığı, "Samtredia"nın belə hesabla uduzmasını istəməzdim. Oyun strategiyası, mütəşəkkilliyi məndə bu komandaya böyük simpatiya oyatdı".
Azərbaycan və Gürcüstanın həmişə dostluq münasibətlərində olduğunu xatırladan baş məşqçi futbol sahəsində də belə bir yaxınlığın olduğuna diqqət çəkib. O, Tbilisi "Dinamo"sunun SSRİ vaxtında kifayət qədər yaxşı oyun sərgilədiyini xatırladıb. Q.Qurbanov iki ölkənin çempionatlarını müqayisə edib: "Gürcüstanda çoxlu dəyişiklik baş verib. Bu da ola bilsin, xüsusən maliyyə sarıdan futbolunuza təsirsiz ötüşməyib. Deyərdim ki, biz də belə faktlarla üz-üzəyik. Azərbaycan klubları 5 il əvvəlki ilə müqayisədə daha aşağı səviyyədədirlər. Buna görə də bir çox əcnəbi oyunçu hər il klubunu dəyişir və yeni legioner axtarışlarına başlayırıq. Gürcüstanda isə legionerlərin sayı çox deyil. Klublarınız əcnəbi oyunçu dəvət etməyə çalışmırlar. Bu isə yəqin ki, maliyyə problemləri ilə əlaqədardır. Azərbaycanda isə 2 komanda - "Qarabağ" və "Qəbələ" bu baxımdan yaxşı vəziyyətdədir. Bu, iki ölkə çempionatı arasındakı fərqin səbəbi ola bilər. Amma təkrar edirəm: sabahkı oyunun necə nəticələnəcəyini bilmirik və çətin matç gözləyirik".
Komandasında çoxlu çatışmazlıqların olduğunu deyən baş məşqçi ilk növbədə, kollektiv oyun sarıdan problemləri aradan qaldırmağa çalışdıqlarını söyləyib: "Biz hücum futbolu sərgiləməyə çalışırıq. Oyunçulardan hücuma atılmalarını istəyirik. Eyni zamanda müdafiədə də lazımi səviyyədə çıxış etmək lazımdır. Biz balanslaşdırılmış oyun sərgiləməyə çalışacağıq. Heyətə gəlincə, meydanda 11 daha hazırlıqlı oyunçu olacaq".
Sonda baş məşqçi "Qarabağ"ın adına diqqət çəkib: "Hər bir azərbaycanlı kimi mən də öz ölkəmi çox sevirəm. Bilirəm ki, Qarabağ Azərbaycana məxsusdur. Buna görə də "Qarabağ" və ya digər komandamız Azərbaycan adına ən yaxşısını etməlidir. Bu, Vətənimiz qarşısındakı öhdəliklərimizdən biridir".
Qeyd edək ki, iyulun 18-də keçiriləcək "Samtredia" - "Qarabağ" matçı Bakı vaxtı ilə saat 21:00-da başlanacaq. İlk görüşdə "Qarabağ" 5:0 hesabı ilə qalib gəlib.
