Ötən iki mövsümdə "Kəpəz”in lehinə verilən 11 metrlik cərimə zərbələrini bir qayda olaraq Tural Axundov yerinə yetirib. Sabiq kapitan həmişə dəqiq zərbələr ilə diqqət çəkərək heç vaxt hədəfdən yayınmayıb. "Sarı-göylər”in ştatlı penalti vuranı olan Axundovun klubdan gedişi ilə maraqlı vəziyyət yaranıb. Bəs, bundan sonra "Kəpəz”in 11 metrlik zərbələrini kim vuracaq?
Sportnet.az-ın məlumatına görə, "Kəpəz"in rəsmi saytı bu suala aydınlıq gətirmək üçün sorğu aparıb...
Şəhriyar Rəhimov: "11 metrliyi sırf kapitan vurmalıdır deyə qayda yoxdur. Sadəcə, həmin an hansı futbolçu özünə daha çox inanırsa, zərbəni də vurmalıdır. Açığı, bu vaxta kimi heç bir klubda penalti yerinə yetirməmişəm. Fürsət düşəndə də bundan vaz keçmişəm. İlk növbədə belə zərbələri dəqiqliklə vurmağı bacarmalısan. Birini vurub, növbəti oyunda səhvə yol vermək istəmirəm. Tural Axundov həmişə penaltiləri çox soyuqqanlı və dəqiqliklə yerinə yetirirdi. Ola bilər ki, hansısa matçda məsuliyyəti öz üzərimə götürüm. Amma bütün zərbələri boynuma götürə bilmərəm. Məşqçi məsləhəti də bunda rol oynayır. Yenə deyirəm, kim daha hazırlıqlı və psixoloji cəhətdən özünə əmindirsə, nöqtəyə həmin oyunçu da yaxınlaşmalıdır”.
Davud Kərimi: "Fikrimcə, penaltini kimin vuracağını təyin etmək məşqçilər korpusuna aid məsələdir. Bu, baş məşqçi Şahin Diniyevin məsləhəti ilə olacaq. Yəqin ki, məşqlərdə sınaqdan keçirilənlər olacaq və kim zərbələri daha yaxşı yerinə yetirsə, onun üzərində dayanılacaq. Mənə elə gəlir ki, yerli futbolçularla yanaşı, legionerlər də bunun öhdəsindən gələ bilər. Məncə, Samba Diallo və Viktor Laki də pis alınmaz. Şəhriyar Rəhimov və Kərim Diniyev də 11 metrliyi vura biləcək gücdədir. Təki lehimizə penalti olsun, vurmaq çətin olmaz (gülümsəyir)”.
Şəhriyar Əliyev: "Penalti vurmaq doğrudan da məsuliyyətli bir işdir. Çəkinmirəm, mən də vuraram. Məncə, Kərim Diniyev daha yaxşı vurar. Məşqdə elə zərbələr vurur ki, top az qalır toru cırıb keçsin (gülür). Uzaq məsafələrdən də yaxşı zərbələri var. Elə düşünürəm ki, bu işi Kərimə həvalə etmək olar. Məsuliyyəti komanda yoldaşımın boynuna atmaq istəmirəm. Diniyev mövqe baxımından məndən irəlidə oynayır və rəqib qapısına daha yaxın olur. Təbii ki, zarafat edirəm. Mən 11 metrliyi Kərimin yerinə yetirməsini istərdim. Bir də ki, kimin zərbəni vurmasından asılı olmayaraq təki qol olsun”.
"Kəpəz”in baş məşqçisi Şahin Diniyev: "Hələ dəqiqləşdirməmişik, önümüzdəki günlərdə bu suala cavab tapacağıq. Məşqlərdə və ikitərəfli oyunlarda siz dediyiniz məqama aydınlıq gələcək”.
