"Qarabağ"ın Danimarka "Kopenhagen"i ilə Çempionlar Liqasının "pley-off" mərhələsi çərçivəsində keçirəcəyi ilk oyuna artıq 20 minədək bilet satılıb. Klubdan Sportnet.az-a verilən məlumata görə, biletlərin, satışa çıxarıldığı son iki gün ərzində xeyli alıcısı olub.
Tofiq Bəhramov adına Respublika stadionunun kassaları önündə növbələr səngimək bilmir. Oyun zamanı anşlaq olacağı ehtimalı böyükdür.
Digər tərəfdən, stadionda elektron reklam lövhələri quraşdırılır. UEFA-nın tələbi əsasında aparılan işlərin sabahadək yekunlaşacağı gözlənilir.
Qeyd edək ki, avqustun 15-də keçiriləcək "Qarabağ" - "Kopenhagen" matçı saat 20:00-da başlanacaq. Cavab görüşü avqustun 23-də olacaq.
